Семейліктер карантиндік шектеулерден кейін алғаш рет Наурыз мейрамын кеңінен атап өтті.
Негізгі мерекелік шаралар Орталық алаңда ұйымдастырылды. Таңертеңнен бастап алаңда мерекелік көңіл-күй орнады. Қала тұрғындары мен қонақтарына тегін палау, шай және бауырсақ таратылды. Мерекенің міндетті атрибуты керемет әрі дәмді наурыз-көже болды.
Күні бойы қазақ күресі, гір спорты, армреслинг бойынша спорттық жарыстар өткізілді. Мереке қонақтары асық ату ұлттық ойынында өз шеберліктерін сынап, атқа мінуге мүмкіндік алды.
Этнографиялық көрме ашылған алаңда ондаған киіз үйлер орнатылды. Сондай-ақ, «Шеберлер қаласында» жергілікті қолөнершілер өздерінің сәндік-қолданбалы өнер туындыларын ұсынды.
Сағат 12-де театрландырылған қойылым басталды. Актерлер күн мен түннің теңесуі бейнелерін көрсетіп, Наурыз мейрамына байланысты жекелеген фольклорлық ғұрыптарды сахналады. Шара соңында Қыдыр ата жиналған қауымға бата берді. Осыдан кейін, әдемі безендірілген киіз үйлерден 100 әже шығып, тілек білдірушілерге қазақ дастарқанының басты рәміздерінің бірі – бауырсақты таратты.
Шығыс Қазақстан облысының әкімі Даниал Ахметов Семей тұрғындарына арнап құттықтау сөз сөйледі. Даниал Кенжетайұлы Қазақстан Республикасы Президенті Қасым-Жомарт Тоқаевтың Абай облысын құру туралы шешіміне орай қала тұрғындарын құттықтады.
«Ел Президентінің бұл шешімі Семейдің еліміздің рухани орталығы ретінде дамуына қосымша серпін береді. Әрине, бұл аймақ экономикасының дамуына да ықпал етеді. Сіздерді Наурыз мерекесімен құттықтаймын! Қазақстанның тәуелсіздігі, халықтың бірлігі мен келісімі – біздің басты байлығымыз! Әр отбасыға бақыт пен амандық тілеймін. Қазақстан жасасын!»- деді Шығыс Қазақстан облысының әкімі Даниал Ахметов.
Даниал Ахметов мемлекеттік наградалар табыстады.
Қазақстан Республикасы Президентінің Жарлығымен «Парасат» орденімен Шығыс Қазақстан облысының №1 олимпиадалық резервтегі мамандандырылған балалар-жасөспірімдер спорт мектебінің директоры Мерейғалы Көшкінов марапатталды. «Құрмет» орденімен Семей қаласы мәслихатының хатшысы Бейсенбек Ақжалов, Аягөз аудандық «Мөлдір сана» газетінің редакторы Бақытөмір Шалғымбаев, Тарбағатай ауданы Имашев атындағы балалар-жасөспірімдер спорт мектебінің жаттықтырушысы Қанат Ильясов марапатталды.
«Шапағат» медалімен Р.Байсейітов атындағы Семей қаржы-экономикалық колледжінің студенті Мерейбек Мағәбілов және Зайсан ауданынан еңбек ардагері Раиса Шотаева марапатталды.
Қазақстан Республикасы Президентінің «Алғыс» төсбелгісімен «СемАз» ЖШС директоры Әсемхан Дускужанов және Семей медицина университетінің балалар жұқпалы аурулары кафедрасының меңгерушісі Имдат Эфендиев марапатталды.
Сағат 12.45-те концерттік марафон басталды. Ә.Қашаубаев атындағы облыстық филармония ұжымы, жергілікті университеттердің студенттері, қалалық мәдениет сарайының әртістері өздерінің үздік нөмірлері мен шығармаларын ұсынды.
Сағат 21.00-де мерекелік отшашу ұйымдастырылып, алаңдағы мерекелік бағдарлама жастарға арналған би кешімен аяқталады.
Анар АХМЕТҚАЛИЕВА,
«Семей таңы»
