Семей
1500-ден АСА БЕЙНЕБАҚЫЛАУ КАМЕРАЛАРЫ ОРНАТЫЛАДЫ
Семей шаһары, дәлірек айтқанда қала көшелері алдағы уақыттарда өркениет әлемінің жаңа игіліктерімен толыға түспек. Абай облысының орталығы аталудан бұрын қаламызға заманауи технологиялық құрал – бейнебақылау құрылғылары келмек.
Қала халқы әсіресе, көлік жүргізушілері Семей көшелерінде Сергек камераларының орнатылатынын қазірден бастап құлағдар болуда. Бұл ерекше құрылғы тек жол-көлік қозғалысындағы ғана емес, көшелермен қиылыстардағы түрлі бұзақылықтар мен құқық бұзушылықтардың да алдын алуға немесе орын алған фактілерді ашуға өзіндік септігін тигізеді. Яғни, тәртіп пен тазалықтың сақталуын қадағалауда да пайдасы бар.
Семей қаласында фото-бейнетіркеу жүйесін құру және пайдалану жобасына сәйкес жалпы саны 40 көше қиылысында және 74 желілік учаскеде 1551 камера жұмыс істейтін болады. 687 жалпы бейнебақылау камералары және қолданыстағы 88 (65 камера — білім беру объектілерінде) камералар осы жүйеге кіріктіріледі.
Бейнебақылау камераларын орнату жұмыстары 23 наурызда басталды. Бұған дейін Семей қаласында Өскемен қаласының ахуалдық орталығында бейнені көрсететіндей 10 локацияда 20 камера орнатылған болатын. Байланыс арнасын ұйымдастыруды, жабдықтарды жеткізу мен монтаждауды ағымдағы жылдың 15 мамырында аяқтау жоспарлануда. Алайда бұл тек тәжірибелік пайдалану кезеңі саналады екен.
Қазіргі таңда, «Көркем Телеком» ЖШС ұйымы қаржылық қажеттіліктерді жабу, банк кредиттерін алу кезеңдерін айқындап, жеткізушілермен алдын ала шарттар жасасуда.
Сөз орайында айта кетелік, жалпы бұдан бөлек, бүгінгі таңда аймағымызда бейнеманиторингтің ұлттық жүйе жобасы жүзеге асырылуда, оған сәйкес Полиция департаменті бейнебақылау камераларын көбейту, сондай-ақ барлық камераларды байланыстыру бойынша Жол картасын әзірлеуде. Аталмыш мониторинг жүйесіне барлық нысандар, соның ішінде сауда-сауық орталықтары да қосылады. Жалпы алғанда, бүгінгі күні Шығыс Қазақстанда 18 мыңнан аса бейнебақылау камералары орнатылған.
Әлібек КЕМЕЛХАН,
«Семей таңы»
