АЗЫҚ-ТҮЛІК БАҒАСЫН ҚЫМБАТТАТПАУҒА ШАҚЫРДЫ
Күллі мұсылман әлемі асыға күткен Рамазан айы есік қағып тұр. Бұл айдың өзіндік ерекшеліктері бар: түрлі қайырымдылық шараларын ұйымдастырып, сауапты амалдар жасау ләзім.
Биылғы Ораза айт 2 мамырда атап өтіледі, Қадыр түні – 28 сәуірге қараған түн. Бұл туралы Семей қаласының аймақтық коммуникациялар қызметінде өткен брифингте Семей өңірінің бас имамы Асқар Әбітайұлы айтып берді.
– Өкінішке орай, соңғы екі жылда санитарлық-эпидемиологиялық талаптарға байланысты біз мешітіміздің есігін жамағатымызға аша алмадық. Барлық іс-шаралар онлайн форматында өтті. Биылғы жылы жағдай тұрақтанғандықтан, Рамазан айы дәстүрлі форматта өтетін болды, – деді Асқар Әбітайұлы.
Биылғы пітір садақаның көлемі 500 теңге болып бекітілді.
– Бізде пітір садақаның көлемі екі келі бидайдың (ұн, жарма және т.б.) бағасымен есептеледі. Қазір екі келі ұнның бағасы республика бойынша 500 теңгені құрайды. Міне, сондықтан да пітір садақаның құны 500 теңгені құрайды, – деді өңірдің бас имамы Асқар Әбітайұлы.
Сонымен қатар бас имам жергілікті кәсіпкерлерден азық-түлік бағасын көтермеуді сұрады және қымбат өнімдерді сатып ала алмайтын адамдарға жомарттық танытуға шақырды.
Өз тілшіміз
БІЗДІҢ ЖАҢАЛЫҚТАРДЫ ТЕЛЕГРАМНАН ОҚЫҢЫЗ!
