ӨҢІР ЭКОНОМИКАСЫНДА НАҚТЫ ӨСІМ БАР
Апта ішінде қалалық мәслихат депутаттарының кезекті, 23-ші сессиясы өтіп, шаһар басшысы Бақытжан Байахметов депутаттар алдында есеп берді. Сессияда жергілікті мәслихат депутаттары 2021 жылғы бюджеттің атқарылуы туралы есепті бекітті.
Қала басшысының айтуынша, өңірдің әлеуметтік-экономикалық дамуы тұрақты оң динамиканы көрсетеді. Бұл орайда экономиканы дамытудың негізгі драйверлері өңдеу өнеркәсібі болып табылады. Қуантарлығы, өткен жылы аталмыш салада өсім жоғары болды. Ендігі міндет — осы бағытты жалғастырып, өнеркәсіп өнімінің көлемін арттыра беру.
Қала әкімі айтып өткендей, экономиканың нақты секторы экономиканың орнықты дамуы мен өсуіне, инновациялық-технологиялық үрдіске, сондай-ақ әлеуметтік әл-ауқатқа қол жеткізуде басым рөл атқарады. Өткен жылы Бизнестің жол картасы бойынша 13,7 млрд теңгеге 606 жоба субсидияланыпты. Бұл алдыңғы жылдың сәйкес кезеңінен әлдеқайда артық.
Сонымен қатар «Ақ Ниет» жеңілдетілген несиелендірудің өңірлік бағдарламасын іске асыру шеңберінде жалпы саны 43 жоба қаржыландырылыпты. Яғни аталған бағыттағы жобаларды қаржыландыру көлемі артқан. Ал «Қарапайым заттар экономикасы» бағдарламасы шеңберінде 2,1 млрд теңгеге төрт жоба іске асырылыпты.
Агроөнеркәсіптік кешенді дамытудың мемлекеттік бағдарламасы шеңберінде мол көлемде субсидия бөлінді, бұл алдыңғы жылға қарағанда анағұрлым артық.
Қала әкімі сонымен қатар өткен жылы ауыл шаруашылығының жалпы өнімінің көлемі артып, ағымдағы жылы егіс алқабының бірнеше пайызға ұлғайтылғанын, айналымға қосымша 1 500 гектар суармалы жер алынғанын да айтып өтті. Өңіріміз бойынша дәнді дақылдар мен майлы дақылдар және картоп, көкөніс пен бақша дақылдарын өсіру де біршама артып отыр. Осы ретте «Агрофирма Приречное» ЖШС құны 159 млн теңге болатын 360 гектар жерге арнайы суландыру жүйесін салды. Оның нәтижесінде арнайы жұмыс орындары да ашылып отыр.
«Ауыл — Ел бесігі» бағдарламасы шеңберінде инфрақұрылымды жаңғырту есебінен, оны жаңа өңірлік стандарттар параметрлеріне жеткізе отырып, ауылдағы өмір сапасын жақсарту үшін жағдайлар жасалуда.
Өткен жылы өңіріміз бойынша күрделі жөндеу және қайта жаңғырту жұмыстары да қарқынды түрде жүргізілді. Соның ішінде көшелерді жарықтандыру шараларын айтсақ болады. Мәселен, өткен жылы Приречное ауылында 32 млн теңге қаржыға көшелер орташа жөндеуден өткізіліп, 22,5 млн теңгеге жарықтандыру жұмыстары жүргізіліпті.
Бұл бағыттағы шаралар ағымдағы жылы да жалғасын табатынын айтқан қала әкімі Шығыс, Березовский және Бобровка кенттерінде жалпы құны 2,7 млрд теңге болатын сумен жабдықтау желілерінің құрылысы бойынша жобаларды іске асыру басталатынын жеткізді. Лодочный, Алматы, Ақбұлақ, Мұрат, Половинка ауылдарында су құбыры желілерінің құрылысына сараптама алынды.
Сессияда мәслихат депутаттары Семей қаласының ауылдық округтерінің өткен жылғы бюджетінің атқарылуы туралы есепті және қала мен ауылдық округтердің ағымдағы жылғы бюджетіне өзгертулер енгізуді бекітті.
Әлібек КЕМЕЛХАН,
«Семей таңы»
