КЕЗДЕСУ КЕСТЕСІ БЕКІТІЛДІ
Мәслихат сессиясында қала әкімінің тұрғындармен кездесу кестесі талқыланды.
Қазақстан Республикасы Президентінің 2022 жылғы 3 наурыздағы № 826 Жарлығына сәйкес Республикалық маңызы бар қалалардың әкімдері тоқсан сайын халықпен кемінде бір кездесу өткізуі тиіс.
Жыл соңына дейін қала және ауылдық округ тұрғындарымен 100-ге жуық кездесу өткізу жоспарланған. Сәуір және мамыр айларында қала тұрғындарымен 6 кездесу, ауылдық округтер халқымен 10-нан астам кездесу өтеді.
Естеріңізге сала кетейік, өткен жылы Семей қаласының әкімі 152 кездесу өткізді, оның ішінде 124 -і қалада, 28–і ауылдық және кенттік округтерде өтті.
Мәслихат сессиясында 2022 жылғы 1 қаңтардан бастап 31 желтоқсанды қоса алғанда Семей қаласында туристерді орналастыру орындарында шетелдіктер үшін туристік жарнаның мөлшерлемесі тұру құнының 0 (нөл) пайызы болып бекітілді.
— «Қазақстан Республикасындағы туристік қызмет туралы» Заңның 7-1-бабына сәйкес туристік жарна ұғымы айқындалған. Бұл туристерге жатақханаларды, қонақ үйлерді, қалалар мен аудандардағы жалға берілетін тұрғын үйлерді қоспағанда, туристерді орналастыру орындарында болған әрбір тәулік үшін алынатын төлем.
Сондай-ақ мәслихат депутаттары қылмыстық жазаны және қылмыстық-құқықтық ықпал етудің өзге де шараларын орындайтын мекемелер мен органдардың қызметіне жәрдемдесу, сондай-ақ қылмыстық жазасын өтеген адамдарға әлеуметтік және өзге де көмекті ұйымдастыру жөніндегі комиссияның дербес құрамын бекітті.
Семей қаласы мәслихатының 23-ші сессиясында қаралған тағы бір мәселе Абай облысын құруға қатысты болды. Сессияда Семей қаласын және қалаға іргелес ауылдық округтер мен кенттерді құрылатын Абай облысының құрамына енгізу туралы ұсыныстар келісілді.
Сонымен қатар қалалық мәслихат депутаттары Қоғамдық кеңестің құрамын бекітті.
AMANAT партиясынан 4 жаңа депутат Семей қалалық мәслихатының қатарын толықтырды. Олар: Alikhan Bokeikhan University рухани-патриоттық тәрбие бөлімінің басшысы Әліби Әбдірайымов, «Тұрсын Е.С.» ЖК директоры Еркебұлан Тұрсын, «Otbasy Bank» АҚ филиалының директоры Равиль Сәбитов және жоғары гуманитарлық техникалық колледжінің директоры Болат Серғазинов. Сондай-ақ «Ақ жол» партиясының депутаты Гүлжанат Рахатқызының өкілеттігі өз еркімен тоқтатылды.
«СТ» — ақпарат
