Альфа-Банк Қазақстан несие беру тоқтағанын, сондай-ақ қолма-қол ақша алу мен аударымдарға лимит енгізілгенін хабарлады, — деп хабарлайды Tengrinews.kz тілшісі.
«Кеше Альфа-Банк Қазақстан АҚШ санкциясына ілікті. Бұл клиенттер үшін нені білдіреді?
Біз АҚШ доллары және еуро аударымдарын уақытша тоқтатамыз. Ұсыныс: Сіз банкомат және банк бөлімшелерінен қолма-қол ақша алып, басқа банктерде теңгеге ауыстыра аласыз. Сондай-ақ, валютаны теңгеге айырбастау мүмкіндігі бар», — делінген хабарламада.
Сонымен қатар, жеке желіден тыс Visa және MasterCard карталары уақытша жұмыс істемейді.
Банк клиенттерге Альфа-Банк банкоматтарын қолдануды ұсынады. Қазіргі уақытта шетелде жүрген клиенттер қолма-қол ақша ала алады немесе басқа банк карточкасымен төлем жасай алады.
«Қолма-қол ақшаны алу мен аударуға уақытша шектеулер енгіземіз — күніне 2 миллион теңге (немесе басқа валютада осы баламада). Кеңес: 2 миллион теңгеден астам қаражатты алу қажет болса, банкке хабарласып, 5 жұмыс күні ішінде қолма-қол ақша алуға тапсырыс беру керек», — деп толықтырды банк өкілдері.
Жеке және заңды тұлғаларға несие беру уақытша тоқтатылған. Бұл ретте банк қазіргі клиенттер үшін пайыздық мөлшерлеме өзгеріссіз қалғанын және келісімшарт талаптары өзгермейтінін атап өтті.
Клиенттер лимит аясында басқа банктегі есепшот нөмірі бойынша мобильді қосымшада өз қаражатын теңгемен, басқа банктегі есепшотына аудара алады. Қазақстан ішінде теңгедегі аударымдар, банк қосымшалары мен интернет-банкингте стандартты режимде жұмыс істейді.
Банк төлемдерді рубльмен қабылдау және орындауды жалғастырады.
«Коммуналдық қызметтер, ұялы байланыс және басқа да төлемдер штаттық режимде жүргізіледі.
Мобильді қосымшада валюта айырбастау тарифтік жоспарға сәйкес стандартты шекте жүргізіледі.
2022 жылдың 24 ақпанына дейін ашылған депозиттер Теңгелік депозиттерді қорғау бағдарламасына толық көлемде қатысады. Бағдарлама аяқталғаннан кейін бағдарлама шарттарына сәйкес салым сомасының 10 пайызы есепке алынады», — делінген хабарлмада.
Альфа-Банк Қазақстан қабылданған шектеулер клиент қаражатының сақталуына және қолжетімділігіне әсер етпейтінін мәлімдеді.
«Банк депозиттер бойынша барлық міндеттемеге жауапты: пайыздар есептеледі және төленеді, клиенттер шотынан ақша алынады. Бізде клиенттер алдында барлық міндеттемені орындауға жеткілікті өтімділік пен меншікті капитал бар. Сондай-ақ, қазақстандық депозиттерге кепілдік беру ұйымының мүшесіміз», — деп қорытындылады банк өкілдері.
