КҮРШІМДІ КӨРКЕЙТЕР ЖОБАЛАР КӨП
Апта ішінде жұмыс сапарымен Күршім ауданына барған облыс әкімі Даниал Ахметов жергілікті жұртшылықпен, мәслихат депутаттарымен кездесіп, аудан әкімі Дулат Қажановтың халық алдындағы есебін тыңдады.
Бүгінгі таңда Күршім ауданы қарқынды дамып келеді. Аймақтың экономикалық әлеуеті де арта түсуде. Жергілікті тұрғындар көптеген табысты бизнес-жобаларды бастауға мүмкіндік беретін Бұқтырма су қоймасы арқылы өтетін көпірдің құрылысына көп сенім білдіруде. Бұл ретте күршімдіктер аталмыш бастамаға қолдау көрсеткен аймақ басшысына да алғыс білдіруде. Аудандағы кәсіпкерлік саласы да біршама жандана түскен. Оған жергілікті биліктің ықпалы да зор.
Көпір құрылысын аудан халқы 50 жылдан астам уақыт бойы күтіп келді. Бұл жайында өз сөзінде аймақ басшысы да айтып өтті.
Жиын барысында сонымен қатар өңірге қарасты шағын ауылдарды ауыз сумен және интернетпен қамтамасыз етуге байланысты мәселелер де кеңінен айтылды. Аудандағы 44 елді мекеннің 25 — інде интернетке қолжетімділік бар екен, биыл тағы 13 ауылға арналған жабдық, ал келесі жылы қалған 6 ауылға арналған жабдық орнатылады.
Сондай — ақ есептік жиын барысында Урунхайка және Марқакөл туристік аймақтарына апаратын жолдарды салу және жөндеу мәселесі қозғалды.
Облыс әкімі күршімдіктер алдында өткен жылы атқарылған жоспарлы шаралар мен ағымдағы жылға межеленген істер туралы да баяндап берді.
— Күршім ауданы шекара маңындағы аумақтарды дамыту бағдарламасына кіретінін атап өткім келеді. Соның ішінде денсаулық сақтауға ерекше назар аударылып отыр. Мен аудандық ауруханада болдым, ол барлық қажетті жабдықтармен жабдықталған, перзентхананы жөндеу қажет, біз оны міндетті түрде жасаймыз, — деді аймақ басшысы.
Аудан тұрғындары облыс әкіміне сот сараптамасы орталығын ұйымдастыру туралы өтініштерін жеткізді. Даниал Кенжетайұлы жергілікті әкімдікке бұл мәселені бейінді құрылымдармен бірге қарауды тапсырды.
— Бүгінгі таңда аудан қарқынды дамып келе жатқанын тағы да айтқымыз келеді, біз барлық тиімді жобаларға қолдау көрсететін боламыз, — дейді бұл орайда Даниал Ахметов.
Қуаныш ЖОЛЫМБЕТ,
«Семей таңы».
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
