Аймақ басшысы Даниал Ахметов арнайы жұмыс сапарымен Зайсан ауданында болып, бірқатар әлеуметтік нысандарды аралады. Аудан әкімі Серік Зайнулдиннің халық алдындағы есеп беру жиынына қатысып, азаматтарды жеке мәселелері бойынша қабылдады.
Зайсан ауданы шекаралас аумақ болып табылатындықтан, агросектордың әлеуеті өте жақсы дамыған. Көптеген шаруалар субсидиялау мен несиелендіру мүмкіндіктерін пайдаланып отыр.
Зайсан ауданында ауыл шаруашылығының әлеуеті артып келеді. Сонымен қатар, соңғы жылдары өндіріс ошақтары да көптеп ашылып, кәсіпкерлік саласы да жандана түсті.
Аймақ басшысының айтуынша, ағымдағы жылы 12 жобаны жүзеге асыру жалғасатын болады. Олардың бірі — артезиан ұңғымасынан минералды су шығаратын зауыт ашу.
«Айта кетейін, Зайсан ауданындағы сегіз ауыл толығымен газдандырылды, әлеуметтік нысандарды газбен қамтамасыз ету мәселесі қарастырылуда. Қарқынды дамып келе жатқан ауданға балабақша керек екені сөзсіз, биыл біз оның құрылысын мемлекеттік-жекеменшік әріптестік аясында бастаймыз. Сондай-ақ екі мектептің құрылысы басталды. Зайсанда «Бір қабатты Шығыс» бағдарламасы бойынша тұтас шағын аудан салынды, сол жерде жеке тұрғын үй құрылысына арналған телімдер қарастырылған, мен оларды газдандыру жобасын қарастыруды тапсырдым, — деп жазды облыс әкімі Даниал Кенжетайұлы инстаграм әлеуметтік желісіндегі жеке парақшасында.
Облыс әкімі іссапар барысында Зайсан аудандық ауруханасына барды. Аурухана дәрігерлері заманауи жабдықтармен жұмыс істейді. Алайда, жарты ғасырлық ғимарат жөндеуді қажет етеді. Аймақ басшысы жөндеу жұмыстары биыл басталатынын айтты.
Халықпен кездесу барысында тұрғындар тарапынан көтерілген мәселелердің бірі интернетке қолжетімділікті қамтамасыз етуге қатысты болды. Бұл мәселе арнайы әзірленген облыстық бағдарлама аясында шешілетін болады.
Айта кетсек, Зайсан ауданы арқылы құрылысы тұрақты бақылауда тұрған маңызды нысандардың бірі — «Омбы — Майқапшағай» тас жолы өтеді.
Жалпы, жиын барысында қозғалған мәселелердің барлығы да аймақ басшысының назарында ұсталатын болады.
Азамат ЕРСАЙЫН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
