Ағымдағы жылы Шығыс Қазақстан облысында тұрғын үй құрылысы қарқын алды. Соның ішінде әсіресе жеке инвестициялар тартудың нәтижесі мол болып тұр. Бүгінде жеке инвестициялар арқылы 82 көп қабатты үй салынып жатыр.
ШҚО әкімдігінің мәліметіне сүйенсек, өткен жылы өңірде 602,8 мың шаршы метр үй пайдалануға берілген. Ал Өскеменде бір жыл ішінде 205,1 мың шаршы метр баспана салынды. Қазірде облыс бойынша 1 млн шаршы метрге жуық тұрғын үй салынып жатыр.
-Былтыр 565 көпбалалы отбасы қоныс тойын тойлады. 2017-2021 жылдары аралығында көпбалалы жанұялардың баспанаға мұқтаждығы бес есеге артты. Жеке тұрғын үй құрылысын арттыру үшін «Бірқабатты Шығыс» өңірлік бағдарламасы жүзеге асырылып жатыр. Өскеменде мемлекет қаржысы есебінен жеті тұрғын ауданға инженерлік коммуникациялар тартылды, — деді бұл орайда жуырда облыстық әкімдікте өткен кезекті жиын барысында аймақ басшысы аймақ басшысы Даниал Ахметов.
Сондай-ақ Шығыс Қазақстанда жеке инвестиция тарту арқылы жалпы аумағы 479 мың шаршы метр 82 көпқабатты коммерциялық үй салынып жатыр.
-Тұрғын үй құрылысы — кез келген қаланың дамуының маңызды индикаторы. Өскеменде қазір 350 мыңнан астам адам тұрады. Халық саны үздіксіз өсуде. Соған қарай әлеуметтік тұрғын үй құрылысы қарқын алатыны түсінікті, — дейді бұл орайда мамандар.
Бір ғана мысал, облысымыз бойынша қазіргі таңда Өскемен қаласында жаңа үйлер салу мен түрлі санаттағы азаматтардың тұрғын үй алуы жөніндегі бағдарламалар тиімді іске асырылуда. 2018 жылдан бастап 2021 жылға дейін 4872 пәтерге арналған 58 жаңа көппәтерлі тұрғын үй салынды. 297 жеке тұрғын үй пайдалануға берілді.
Атап айтар болсақ, соңғы он жыл ішінде қалада 19-шы, 21-ші, 22-ші, 23-ші шағын аудандар қарқынды дамып келеді екен. «Бір қабатты Шығыс» бағдарламасы бойынша 28-ші тұрғын ауданында 53 үй салынды.
Қазіргі таңда, облыс орталығындағы Сәтпаев даңғылы бойында 12 қабатты төрт үй мен 16 қабатты бес тұрғын үйдің құрылысы жүріп жатыр. Шығыс Қазақстан облыстық драма театрының артындағы алаңда да құрылыс белсенді жүргізілуде.
Анар АХМЕТҚАЛИЕВА,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
