Аймағымызда ағымдағы жылы облыс ауруханаларында онкологиялық ауруға күдікті науқастарды тез арада тексеруді көздейтін «жасыл дәліз» жұмыс істей бастады. Бұл – облыстың медицина саласындағы ерекше жаңалық.
Атап айтар болсақ, бұл жаңашылдықтың басты тиімділігі — жергілікті емханаларға анамнез және сараптама алу үшін бар болғаны бес күн ғана мерзім беріледі, оған талдаулар мен рентгендік зерттеулерді жинау шаралары да кіреді. Содан кейін науқас аудандық онкологке жіберіледі, ол он күн бойы қосымша зерттеулер жүргізеді, қажет болған жағдайда, науқас КТ және МРТ-дан өтеді.
— МРТ және КТ тегін жүргізіледі, жолдаманы өз емханасынан алуы керек. Бұл зерттеулер «жасыл дәліз» аясында кезектен тыс жүргізіледі. Науқастың мұны білуі және оны талап ете алуы маңызды, — деп атап өтті осынау орайда облыстық Көпсалалы онкология және хирургия орталығының директоры Анна Кухарева.
Осыдан кейін облыс тұрғыны онкологиялық орталыққа жіберіледі. Онда мамандар гистологиялық сынамалар алады және т.б. тереңдетілген зерттеулер жүргізеді. 15 күннен кейін емдеу шаралары белгілі болады.
Бұл жетістіктерге облысымыздағы емдеу мекемелерін заманауи технологиялармен жабдықтаудың және дәрігерлердің біліктіліктерін арттырудың нәтижесінде қол жеткізіліп отырғаны анық.
Азамат ЕРСАЙЫН,
«Семей таңы»
БІЗДІ ӘЛЕУМЕТТІК ЖЕЛІЛЕРДЕН ОҚЫҢЫЗ!
