ӘЛЕУМЕТТІК МАҢЫЗДАҒЫ ӨНІМДЕР БАҒАСЫ ТҰРАҚТЫ НАЗАРДА
Шығыс Қазақстан облысының әкімі Даниал Ахметов облыстық әкімдікте аймағымыздағы әлеуметтік маңызы бар азық-түлік өнімдерінің бағасын тұрақты ұстап тұру мәселесі бойынша қала және аудан әкімдерімен кеңейтілген кеңес өткізді. Жиын барысында басқа да бірқатар өзекті мәселелер талқыланды.
Кеңесте айтылғандай, осыған дейін арнайы құрылған мобильді топтар 20 мыңнан астам сауда нүктелерін тексеріп, 504 заң бұзушылықты анықтаған екен. Бұл, негізінен, бағаны жасанды көтеру және рұқсат етілген сауда үстемесін елемеу фактілері.
Жалпы, аудандарда мұндай шаралар өңіріміздегі ірі қалаларға қарағанда әлдеқайда жақсы жүргізілетінін атап өту керек. Оған әкімдіктердің жүйелі жұмыстары ықпал етуде.
Мониторингтік топтардың қызметі келесі алгоритм бойынша жүзеге асырылады: азаматтардың жүгінуі – тексеру-ескерту, бірінші рет — 10 АЕК көлемінде айыппұл салынады. Осының арқасында қазір баға тұрақтанып келеді. Азық-түліктің бес түрінің құны төмендетілді.
— Заң бұзушылық қайта анықталған жағдайда, әкімшілік жаза сомасы 75 АЕК-ке жетеді. Біз бағаны тұрақтандыруға, ал бес атау бойынша төмендетуге қол жеткіздік. Бұл өте маңызды, өйткені әлеуметтік маңызы бар өнімдер — бұл зейнеткерлердің, халықтың аз қамтылған және басқа да қорғалмаған топтарының тұтыну қоржынының негізі, — деп атап өтті аймақ басшысы Даниал Кенжетайұлы.
Кеңес барысында сондай-ақ облыс басшысы қалалар мен аудандардың әкімдеріне 7 мамырға дейін Ұлы Отан соғысының барлық ардагерлерін құттықтауды тапсырды. Бұл орайда айта кетерлігі, біздің облысымыз бойынша соғыс ардагерлеріне жыл сайынғы бір реттік ақшалай төлем түріндегі әлеуметтік көмек — 1,5 миллион теңге көлемінде сыйақы қарастырылған.
Әлібек КЕМЕЛХАН,
«Семей таңы»
