Шығыс Қазақстан облысының әкімі Даниал Ахметов Өскемен қаласының 28-шағын ауданына барып, ондағы жағдайды бақылап қайтты. Қазіргі таңда аталмыш шағын ауданда жеке тұрғын үй құрылысы қарқынды жүргізіліп жатыр. Бұл туралы аймақ басшысы әлеуметтік желілердегі жеке парақшасында жазды.
Облыс басшысының айтуынша, осыған дейін жалпы саны 54 жобалық үй пайдалануға берілген. Сонымен қатар қазіргі күні 1000-нан астам жер учаскесі құрылыс жұмыстарын жүргізуге дайын. Барлық қажетті инженерлік инфрақұрылым жүйесі — жолдар, балалар алаңдары және басқа да абаттандыру нысандары қарастырылған.
— Көктем мезгілінде жер асты сулары деңгейінің көтерілуіне байланысты бірқатар мәселелер туындағаны рас. Арнайы құжаттар дайындалып, барлық қажетті жөндеу жұмыстарды басталады. Бұдан басқа, алдағы уақыттарда да осындай жағдай қайталанбауы үшін қосымша геологиялық зерттеулер жүргізілетін болады. Қажет болған жағдайда, мұнда суларды бұру технологиясы қолданылады,- деді облыс әкімі.
Шағын ауданда мектеп, үш балабақша және жүз орындық емхана салу жоспарланған.
Аймақ басшысы Даниал Кенжетайұлы жергілікті құзырлы органдар өкілдеріне аудандағы үйлердің жобалары әр түрлі болуы үшін өзге де жобаларды дайындауды тапсырды. Пайдалануға берілген 54 үй өте ыңғайлы әрі заманауи үлгіде салынған. Жақын арада бұл аумақ облыс орталығындағы болашағы жарқын аудандардың біріне айналары сөзсіз.
Әлібек КЕМЕЛХАН,
«Семей таңы»
