Шығыс Қазақстан облысында биыл ауыл шаруашылығы дақылдарының егіс алаңы 14,6 мың гектарға дейін артты. Бұл соңғы жылдардағы жоғары көрсеткіш болып отыр. Қазіргі таңда ауа райының қолайлы болуы дала жұмыстарының уақытында аяқталуына септігін тигізуде.
Биыл шаруалар күннің күрт жылуына байланысты егіс жұмыстарын жылдағыдан ерте бастады. Ауыл шаруашылығы дақылдарының егіс алаңы 1393,3 мың гектарға жетіп отыр. Бұл өткен жылмен салыстырғанда 14,6 мың гектарға артық.
ШҚО Ауыл шаруашылығы басқармасы басшысының міндетін атқарушы Рамиль Сағандықовтың айтуынша, көктемгі егіс және егін жинау жұмыстарын нәтижелі жүргізу үшін облыстық бюджеттен жалпы көлемі 6 млрд теңге субсидия бөлінген. Бұл өткен жылғы сомадан 577 миллион теңгеге көп.
– Атап айтқанда тұқым шаруашылығын қолдауға – 2 млрд 367 млн, минералды тыңайтқыштардың құнын арзандатуға – 2 млрд, пестицидтердің бағасын арзандатуға – 1 млрд 472 млн және суармалы суды жеткізу бойынша қызметтердің құнын субсидиялау үшін 179 млн теңге қарастырылған. Аймақ бойынша дәнді және дәнді-бұршақты дақылдар 601,9 мың гектарға, оның ішінде күздік дақылдар 36,5 мың, майлы дақылдар 484,7 мың, азықтық дақылдар 274,4 мың, картоп 19 мың, көкөністер мен бақша өнімдері 13,3 мың гектарға егілді, – деді Рамиль Сағандықов.
Айта кетерлігі, биыл аймақ басшысы Даниал Ахметовтің қолдауымен облыс бойынша азық-түлік қауіпсіздігін қамтамасыз ету және ауылшаруашылық дақылдарын өсірудің тиімділігін арттыруға қатысты бірқатар іс-шаралар қолға алынған.
Әлібек КЕМЕЛХАН,
«Семей таңы»
