Шығыс Қазақстан облысында биылғы жылы 8 860 оқушы мектеп бітіріп, үлкен өмірге қадам басты. Облыстық ақпарат орталығында өткен баспасөз мәслихаты барысында ШҚО білім басқармасының басшысы Сайрангүл Жұмаділова 2021-2022 оқу жылын қорытындылады.
— Өңір бойынша 644 мектепте 194 476 бала оқыды. Соңғы қоңырау дәстүрлі түрде 25 мамырда офлайн форматында өтті. Аттестатты салтанатты тапсыру және бітіру 16-17 маусымға жоспарланған. Іс-шаралар мектеп қабырғасында өткізіледі, — деді білім басқармасы басшысы.
Басқарма басшысының айтуынша, биыл 11 сыныпты 8860 оқушы аяқтады. Оның ішінде 564 түлек — «Алтын белгіге», 789 мектеп бітіруші — үздік аттестатқа үміткер.
— 9 сыныпты 17 264 бала бітірді. Олар үшін 28 мамырда басталған қорытынды емтихандар 6 маусымға дейін жалғасады. Осы уақыт ішінде балалар төрт пән бойынша емтихан тапсырады. Ал 8860 түлектің 7510-ы Ұлттық бірыңғай тестілеу тапсырады. Биыл мемлекеттік білім грантына үміткерлерге ҰБТ-ға екі рет қатысуға мүмкіндік берілді. Бұл ретте мемлекеттік білім беру грантын тағайындау конкурсына қатысу үшін үміткер үздік нәтиже көрсеткен сертификатын ұсына алады, — деді Сайрангүл Жұмаділова.
Сайрангүл Жұмаділова балалардың жазғы маусымдағы демалысы мен қауіпсіздік ережелері туралы кеңірек айтып берді. Биыл өңірде 99,9 пайыз балаларды жазғы демалыспен қамту жоспарланып отыр. Биыл облыс бойынша 995 лагерь жұмыс істейді. Оның ішінде 35-і қала сыртындағы, 475-і — мектеп жанындағы лагерьлер және 485 мектеп жанындағы бейінді алаңдар ашылады.
— Біз биыл қосымша тағы 5 лагерь ашып отырмыз. Облыс әкімінің тапсырмасы бойынша өңірде IT-бағдарламалар өте жақсы жүзеге асырылып келеді. Осыған орай IT-лагерь, тілдік лагерь мен бизнес-лагерь жұмыс істейтін болады. Олар Өскемен, Семей және Риддер қалаларында ұйымдастырылады, — деді Сайрангүл Жұмаділова.
Осы күндері, арнайы кестеге сәйкес, лагерьлерді қабылдау басталған. Төтенше жағдай, денсаулық сақтау, санитарлық-эпидемиологиялық қызмет басқармалары бірігіп, лагерьлердің жұмыс істеуге жарамды-жарамсыздығын анықтайтын болады.
Инабат АБЛАХАТҚЫЗЫ,
Шәкәрім университеті студенті
