«Дені сау ұлт»
Семей қаласындағы Перинаталдық орталық базасында балаларды оңалту және ерте араласу орталықтары ашылды.
Балаларды оңалту орталығы 0 жастан 3 жасқа дейінгі балаларға арналса, ерте араласу орталығы 3 жастан 18 жасқа дейінгі балаларды қабылдайды. Орталықтарды ашудағы басты мақсат – балалар арасындағы мүгедектікті азайту. Бұл орталықтарда дамуында ауытқу бар және олардың пайда болу қаупі бар 1200-ге жуық бала жыл сайын кешенді оңалту курсынан өте алады. Екі мекемені «Нұрсұлтан Назарбаев қоры» жанындағы «Қамқорлық қоры» корпоративтік қоры мен «Самұрық-Қазына» АҚ орталықтарды медициналық оңалту жабдығымен қамтамасыз етіпті.
Орталықтардың ашылу рәсіміне қала әкімі Бақытжан Байахметов, «Самұрық-Қазына» АҚ-ның қоғаммен байланыс және өзгерістерді басқару жөніндегі басқарушы директоры Ғибрат Ауғанов, «Нұрсұлтан Назарбаев» қорының орындаушы директорының орынбасары Әлкей Марғұланұлы, «Қамқорлық қоры» корпоративтік қорының директоры Арайлым Еркінова қатысты.
— Бүгін бірден балаларға арналған екі орталық ашылып отыр. Бұл — ата-аналар үшін үлкен қуаныш. Мұндай орталықтардың ашылуы — біздің қоғамымыздың, еліміздің дамуының көрсеткіші. Баршаңызға денсаулық пен амандық тілеймін! — деді Бақытжан Байахметов.
— Осындай орталықтар еліміздің басқа өңірлерінде де ашылып жатыр. Біз жаңа Абай облысы халқының әл-қуатын жақсарту үшін алдымызға бірқатар жоспарлар қойып отырмыз. Облыста біздің еншілес компаниялардың өкілдері жұмыс істеуде, солардың арқасында осындай жобалар іске асырылуда. Орталықтарда шетелдің ең заманауи жабдықтары орнатылды, қызмет көрсететін мамандар арнайы даярлау курстарынан өтті. Біз тек қана кішкентай бүлдіршендіріміздің тұсаулары кесіліп, тілдері ерте шыққанын қалаймыз, — дейді Ғибрат Ауғанов.
Перинаталдық орталықтың неонаталдық және педиатриялық қызмет басшысы Гүлжазира Дюсекенова қонақтарды орталық жұмысымен таныстырып, емдік-дене шынықтыру, механотерапия залдарын, педагогтер мен психологтердің кабинеттерін, логопед, дефектолог, сенсорлық, кондуктивтік терапия бөлмелерін, бальнеотерапия кабинетін және бассейнді көрсетті.
Бұл бірегей орталықтарда нейро-ортопедиялық аурулары бар, оның ішінде церебралды сал ауруы бар балаларды оңалтудың әлемдік үздік әдістемелері мен заманауи тәсілдері енгізілген. Мамандар аурудың ерекшеліктерін ескере отырып, әр баланы қалпына келтірудің жеке бағдарламасын жасайды. Оңалту үшін омыртқа мен буындардың қозғалғыштығын және жүру дағдыларын қалпына келтіруге арналған заманауи технологиялар қолданылады, арнайы техникалық құралдар, тренажерлер, аппараттар мен аппараттық-бағдарламалық кешендер қолданылады. Сонымен қатар балалар күнделікті жеке жаттығу терапиясын, физиотерапия, жарық терапиясы, су массажын қабылдайды, логопед және дефектолог мамандар сабақтар өткізеді.
Ерте араласу орталығының негізгі қызметі – дамудың ерте кезеңдеріндегі (3 айдан 3 жасқа дейін) балаларға кешенді оңалту көмегін көрсету, өйткені 3 жасқа дейін баланың миы оңалту емін жақсы қабылдайды. Ем неғұрлым ерте басталса, мүгедектіктің ауырлығы соғұрлым төмен болады және баланың ауруын жеңу мүмкіндігі де жоғары болады. Орталық мамандары ата-аналармен де жұмыс жүргізеді. Оларға баланы көтеру, тамақтандыру, киіндіру, дұрыс отырғызу сияқты қарапайым күнделікті әрекеттер мен қимылдарды үйретеді. Мамандардың айтуынша, оңалтуда ұсақ-түйек болмайды, әсіресе ерте кезеңде барлығы маңызды.
Орталықтар тек қала тұрғындарына ғана емес, облыс аудандары мен қалалардан келушілерге де қызмет көрсетеді.
Дана ТАЛҒАТБЕК,
«Семей таңы»
