Апта сәрсенбісінде Татарстан премьерминистрінің орынбасары Василь Шайхразиев іссапармен Семей қаласына келді. Облыс басшысы Нұрлан Ұранхаев пен Василь Шайхразиев Сабантой мерекесін Абай облысында ұйымдастыру мәселесін талқылады. Яғни, тұңғыш Ертіс маңы Сабантойы Абай облысында өтеді. Мерекеге Татарстан басшысы Рустам Минниханов та қатысады деп жоспарлануда. Кездесу барысында Нұрлан Ұранхаев Қазақстан мен Татарстанды бұрыннан іскерлік және мәдени қатынастар байланыстырып келе жатқанын атап өтті. Сондай-ақ инвестициялық жобалар іске асырылуда. — Құрметті Нұрлан Тельманұлы, бірінші кезекте, Татарстан Республикасы президентінің сәлемін жеткізгім келеді. Алғашқы Ертіс Сабантойын ұйымдастыруға атсалысып жатқаныңыз үшін алғысымды білдіремін. Татар мен қазақ — бауырлас халықтар. Қазақстанда 200 мыңнан астам татар ұлтының өкілдері бейбітшілік пен келісімде өмір сүріп жатыр. Біз әр түрлі саладағы қазақстандық әріптестеріміздің озық тәжірибесін әрқашан қабылдаймыз. Біз Ресейде және басқа да көптеген елдерде Сабантой мерекесін ұйымдастырамыз. Ал биыл 10 қыркүйек күні Семейде алғашқы Ертіс маңы Сабантойын өткізуді жоспарлап отырмыз. Бұл мереке біздің халықтарымызды одан әрі жақындастыра түседі, — деп атап өтті Василь Шайхразиев. — Біз Сабантойды міндетті түрде ұйымдастырамыз, тәжірибе бар. Менің орынбасарым Шалқар Заманбеков осы мәселелермен айналысатын болады. Татарстан Президентінің сапары біз үшін күнделікті оқиға емес. Біз одан әрі ынтымақтастыққа ұмтыламыз. Сабантой бір іс-шарамен ғана аяқталмай, болашақта жалғасын табады деген үміттенемін, – деп түйіндеді сөзін Нұрлан Ұранхаев. Мерекеге Қазақстанның түкпір-түкпірінен, сондай-ақ Ресей Федерациясынан татар этно-мәдени орталықтарының өкілдерін шақыру жоспарлануда. Жалпы, Сабантой — ежелгі ауылшаруашылық мерекелерінің бірі. «Сабантуй» татар тілінде «жер өңдеу тойы» дегенді білдіреді. Татар халқының бұл ұлттық мерекесі Наурыз мейрамына өте ұқсас. Бұл күні халық алаңға жиналады. Түрлі шаралар – ойын-сауық, спорттық сайыстар ұйымдастырылады.
Ерасыл КЕНЖЕБЕКОВ,
«Семей таңы»
