Семей қаласының әкімі Айбек Кәрімовтің төрағалығымен әкімдіктің кезекті отырысы өтті. Әкімдік отырысында тірек ауылдық елдімекендерді дамыту бойынша іс-шаралар жоспарының орындалуы, «Жұмыспен қамтудың жол картасы — 2020» бағдарламасын жүзеге асыру және қаланың тұрғын-үй коммуналдық шаруашылығын одан әрі жаңғырту мәселелері қаралып, жауапты бөлім басшыларының баяндамалары тыңдалды.
Жиында экономика және бюджеттік жоспарлау бөлімі басшысының орынбасары Сәуле Қасенова тірек ауылдық елді мекендерді дамыту бойынша іс-шаралар жоспарының орындалу барысы туралы ақпарат берді. Өз сөзінде ол Новобаженово тірек ауылында 2014-2018 жылдар аралығында жалпы сомасы 2 миллиард 380 миллион 300 мың теңгені құрайтын 36 жобаны іске асырып, нәтижесінде 290 жұмыс орнын ашу көзделіп отырғанын жеткізді. Аталған жобалардың 18-і ауыл шаруашылығы, 3-і кәсіпкерлік, 8-і әлеуметтік, қалған жеті жоба абаттандыру және инфрақұрылымды дамыту бағытындағы болмақ. «Жұмыспен қамтудың жол картасы – 2020» бағдарламасының аясында 6 адам, жиыны 15,5 миллион теңгенің несиесін алуға өтініштерін берген.
Семей қаласына қарасты тірек ауылдардың бірі – Знаменка. Ауылда 2014-2018 жылдар аралығында 32 жобаны іске асырып, 251 жұмыс орнын ашу жоспарлануда. Осы мақсаттта жұмсалатын қаржының көлемі 658 миллион теңгеден аспақ. Оның ішінде «Жұмыспен қамтудың жол картасы – 2020» бағдарламасының шеңберінде 12 адам мал шаруашылығымен айналысуға, бір азамат тігін цехын ашу үшін несие алуға ниет білдірген. Барлық жобалар мақұлдаудан өтіп, оларды жүзеге асыруға қажетті 32 миллион теңге шілде айында бөлінеді деп жоспарлануда.
Ал, Қайнар тірек ауылында жалпы сомасы 745 миллион 800 мың теңгеге 29 жобаны жүзеге асырып, 250 жұмыс орнын ашу көзделіп отырған көрінеді. Оның ішінде «Жұмыспен қамтудың жол картасы – 2020» бағдарламасының аясындағы жұмыстар атқарылуда. Мәселен, мал шаруашылығымен айналысуды көздеген 28 азамат несие алуға өтініш берген. Осы жобаларды іске асыру арқылы 51 жұмыс орны ашылады деп күтілуде.
Айбек Мүталапханұлы аталмыш ауылдық округтердің әкімдеріне мемлекеттік бағдарламалар аясындағы атқарылатын шаруалардың қарқынын үдете түсу, ауылдық жерлерде кәсіпкерлікті дамытуға баса назар аудару қажеттігін ескертіп өтті.
{jcomments on}Қаланың тұрғын үй-коммуналдық шаруашылығын одан әрі жаңғырту жөніндегі жұмыстар туралы тұрғын үй-коммуналдық шаруашылық, жолаушылар көлігі және автомобиль жолдары бөлімі басшысының міндетін атқарушы Әсет Сүлейменов мәлімет берді. Өз сөзінде ол бұл шаруалар екі бағыт бойынша жүзеге асырылып жатқандығынан хабардар етті. Атап айт-қанда, Семей қаласының қазандықтарын және № 1 ЖЭО — ның бұрыннан бар қуаттарын жаңғырту, екіншісі, ҚР тұрғын үй-коммуналдық шаруашылығын жаңғыртудың 2011-2020 жылдарға арналған бағдарламасы негізіндегі жұмыстарға кеңінен тоқталып өтті. Мәселен, 2011 жылы 23 көпқабатты үйде осы бағдарлама бойынша жөндеу жұмыстары жүргізілген көрінеді. Ал, биыл 12 үйдің тұрғындары баспаналарын жөндеуден өткізуге келісім берген. Дегенмен, Әсет Сүлейменов бағдарламаның жүзеге асырылу қарқыны жоғары деңгейде еместігін айтты. Оның өзіндік себептері де жоқ емес. Тұрғындардың сенімсіздігі, несиені рәсімдеуге құлықсыздығы, көптеген үйлерде кондоминиумдардың тіркелмеуі, жобаны сараптамадан өткізуге үй иелерінің шығындалуының қажеттігі. Бағдарламаның қарқынды түрде жүзеге асуына тежеу болып тұрған негізгі факторлар, міне, осындай. Сондай — ақ, Әсет Бауыржанұлы мердігер мекемелердің өздеріне тапсырыл- ған жұмыстарды сапасыз орындаған жағдайлардың да кездесіп, осының салдарынан тұрғындардың терможаңғыртуға деген пікірлері сан қилы екендігін атап өтті. Бұл орайда Физкультурная көшесі, 10 «А», Уральская көшесі, 5, Селевин көшесі, 15 мекенжайларындағы көпқабатты үйлерді мысал етуге болады. Тұрғындардан мемлекетттік бағдарлама аясында жөндеу жұмыстарының сапасыз жүргізілгені туралы шағымдар түскен көрінеді. Бас мердігер «Облдоркомхоз» ЖШС — не ТҮКШ бөлімі тарапынан кемшіліктерді жою бойынша хаттар жолданған. Алайда, жіберілген олқылықтарды түзету бағытында шаралар қолданылмаған және аталмыш тұрғын үйдегі жұмыстар тоқтатылған. Қазір бас мердігер «ШҚО тұрғын үй – пайдалану басқармасы» ЖШС болып табылады.
Ақпаратпен танысқаннан кейін Айбек Кәрімов тұрғын үй-коммуналдық шаруашылығын жаңғыртудың 2011-2020 жылдарға арналған бағдарламасының тиімділігін нақты дәлелдеп көрсету үшін белсенді ПИК-термен жұмыс істей отырып, бұл бағыттағы шаруалар қарқынын арттыра түсу керектігіне назар аударды.
Жұмыспен қамту және әлеуметтік бағдарламалар бөлімінің басшысы Қанатжан Төлесбаев «Жұмыспен қамтудың жол картасы – 2020» бағдарламасын жүзеге асыру туралы ақпаратпен таныстырды. Оның айтуынша, бұл бағыттағы шаруаларды атқаруға 397 миллион 657 мың теңге көлемінде қаражат жұмсалған екен. Ағымдағы «Жұмыспен қамтудың жол картасы – 2020» бағдарламасына 1200 адам қатысқан. 131 адам кәсіптік қайта даярлау мен біліктілікті арттыруға жолданған көрінеді. Сондай-ақ, аталмыш бағдарламаның үшінші бағытының екінші құрамдас бөлігі аясында қатысушылар қатарына Докучаев көшесіндегі 60 пәтерлік шағын отбасылық жатақханаға қоныс аудару үшін 29 жасқа дейінгі 60 адам қосылған. Олардың 18-і ата — ананың қамқорлығынсыз қалған жетім балалар. Осылайша бағдарлама жұмыспен қамту мәселесін шешуден бөлек қоғамның аз қамтылған бөлігінің өкілдерін баспанамен қамтамасыз етуге септігін тигізуде.
Отырыс соңында қала әкімі әлеуметтік салада мәселелердің оңтайлы шешіліп жатқаны жайлы халықты мей-лінше хабардар етіп, жұмысты мүмкіндігінше жариялы түрде жүргізу керек екенін айтып өтті.
Мирас ҚҰСАЙЫН,
«Семей таңы»
