Биыл еліміз 13 жылдан кейін алғаш рет Республика күнін тойлайды. Осы айтулы мерекеге орай Әлихан Бөкейхан университеті мен Қазақстан Жазушылар одағының Абай облысы бөлімшесінің ұйымдастыруымен «Республика күні – ақындар үні» атты жас ақындардың жыр мүшәйрасы өтті.
Саяжан КЕРІМБЕКОВА,
«Семей таңы»
Қазақстан Республикасының егемендігін, тәуелсіздігін жырға қосып, елдігімізді, еркіндігімізді, әлем алдындағы абыройымызды дәріптеп, ұлт бірлігін ұлықтау — мүшәйраның мақсаты. Жас ақындарды қолдау, олардың шығармашылығын халыққа таныстыруды көздеген жыр сайысының шымылдығын Әлихан Бөкейхан университетінің тәрбие жұмыстары және әлеуметтік мәселелер жөніндегі проректоры Айрат Базенов құттықтау сөзбен ашты.
— Республика күніне арналып ұйымдастырылып жатқан жыр мүшәйрасында жас ақындарымыз еліміздің егемендігін, жеткен жетістіктерін, бүгінгі өзгерістерді әдемі сөзбен өрнектеп жеткізе алады деп ойлаймын. Бүгінгі жас ақындардың өлеңдері арқылы тарихымызға үңіліп, жеріміздің қасиетіне бас иеміз деген ойдамын. Жастарымыздың әдемі теңеулермен өрілген жырларымен сусындайтын боламыз деген сенімдімін, — деді Айрат Базенов.
Жыр бәйгесіне Әлихан Бөкейхан университетінің басшылығы, қоғам қайраткері Құсмілия Нұрқасым, Қазақстан Жазушылар одағының Абай облысындағы филиалының төрағасы Мерей Қарт және Қазақстан Жазушылар одағының мүшесі Бауыржан Игілік, университеттің филология кафедрасының оқытушылары Ғалия Ақманова мен Айдар Құдайбергенов қазылық етті.
— Бүгін Республика күніне арналып жас ақындардың мүшәйрасы өтіп жатыр. Жалпы, Абайды тану Алаштықтардан бастау алды. Ұлы ақынның тұңғыш ғылыми өмірбаянын жазған — Әлихан Бөкейханов. «Әдебиет танытқыш» деп аталынатын оқу құралы – бүгінде әдебиет теориясы деп аталады. Алаштықтардың барлығы да — ақындар, ұлтының патриоттары абайтанушылар болды. Семей Алаштың қаласы болды, Алашорда үкіметі осында орналасты. Алаштықтар еліміздің тәуелсіздігін армандады. Ұлттық патриотизм – екі дүниеге негізделеді. Мұхтар Әуезов айтпақшы, ұлттық мектептің екі алтын діңгегі бар. Біреуі – тілі, екіншісі – тарихы. Осы екеуінің үйлескен жері – ақындар. Әлемді көкірегіне жинап алып, барлық дүниені жеткізушілер — осы ақындар. Бәйге, жарыс — бұл қазақтың қанында бар дүние. Әсіресе ақындардың жарысы. Барлық жас ақындарға шығармашылық табыс тілейміз, — деді Құсмілия Нұрқасым.
Жыр жарысында 16-25 жас аралығындағы жастар бақ сынасты. Сайыскерлер өздерінің Республика күніне арналған және еркін тақырыптағы өлеңдерін оқыды.
Мүшәйраның қорытындысы бойынша, бас жүлдені Абай ауданынан келген Қуаныш Еркінұлы жеңіп алды. Әділ қазылар алқасының жоғары бағасына ие болған ақындарға алғыс хаттар мен қаржылай сертификаттар табысталды.
— Бүгін ақындар ұлттық құндылығымыз – тәуелсіздікті жырладық. Мүшәйраға қатысқан 20 шақты жас ақынның ішінен жұлдызымыз жанып, бас бәйгені жеңіп алдым. Ақындық өнер ананың сүтімен, әкенің қанымен берілген деп айта аламын. Бойымдағы қабілетімді жоғалтып алмас үшін үлкен ақындық мектептен өттім. Абай ауданында Төлеген ағамыз басқаратын «Ақсұңқар» мектебі бар. Сол мектептен шыңдалып өстім. Осы күнге дейін бірнеше республикалық мүшәйраларда жеңімпаз атандым. Өте қуаныштымын халқымызды алда келе мерекемен құттықтаймын, — дейді бас жүлде иегері Қуаныш Еркінұлы.
Айта кетейік, мүшәйраға қатысқан жас ақындардың өлеңдері «Әлихан Бөкейхан университетінің кітапханасы» сериясымен шығатын арнайы мүшәйра жырларының жинағына енетін болады.
