Семей қаласында «Әйелдердің ел дамуындағы рөлі» атты аймақтық форум өтті. Форумға ауылдық округтер тұрғындары, өзін-өзі жұмыспен қамтыған, көп балалы аналар, жастар, кәсіпкерлер, депутаттар және қоғам қайраткерлері қатысты.
Әйел — отбасы, ошақ қасы шаруасына жауапты адам ғана емес, қоғамда өзіндік алар орны бар тұлға. Нәзік жандыларды білім беру, денсаулық сақтау, әлеуметтік қызмет салаларымен ғана шектемей, қоғамның барлық салаларына тартуды Президентіміз Қасым-Жомарт Тоқаевтың өзі тапсырған болатын. Сондықтан саяси партиялардан Мәжіліс пен Мәслихатқа сайланатын азаматтар тізімінде әйелдер мен жастардың үлесін 30 пайызға жеткізу міндеттелді. Ұлттық статистика бюросының мәліметінше, әйелдердің көпшілігі сауда (57,1%), тамақтану қызметтерін ұсыну (65,4%), білім беру (72,9%), денсаулық сақтау және халыққа әлеуметтік қызмет көрсету (73% ) салаларын- да жұмыс істейді екен. Форум спикерлері Абай облыстық мәслихатының депутаты, Абай облыстық мәслихатының депутаттық фракциясының басшысы, ҚР Іскер әйелдер қауымдастығының Абай об- лысы бойынша филиалының төрағасы Шолпан Чегедекова, «Терра Вита» ЖШС құрылтайшысы-директоры, денсаулық сақтау саласының үздігі, «Қазақстанның үздік тауары» байқауының бірнеше мәрте жеңімпазы Насихат Исабаева, Жиенәлі ауылдық округінің әкімі Гүлжан Сыздыханова, «Семей Өрнек» ЖШС полиграфиясының директоры, тендер бойынша эксперт Мейрамгүл Апсалямова, Семей қаласының Тұрғын үй инспекциясы басшысы Диана Шаяхметова, Семей қаласының №9 емханасының бас дәрігері, қалалық мәслихат депутаты Нейла Альменева қатысушыларды қоғамда белсенді әрі қаржылай сауатты болуға, мемлекеттік бағдарламаларды тиімді пайдалануға, кәсіп бастауға, өзін-өзі бағалауды өсіруге, тән және жан саулығына мән беруге шақырып, өз тәжірибелерімен бөлісті. «Семей Өрнек» полиграфиясының директоры, тендер бойынша эксперт, көп балалы ана Мейрамгүл Апсалямова бір кездері мемлекеттен атаулы әлеуметтік көмек алуға берген өтініші кері қайтарылғаннан кейін кәсіп бастап кеткенін айтады. Мемлекеттен 5 млн теңге қайтарымсыз грант ұтып алған ол қазір «Семей Өрнек» полиграфиясының директоры атанып, он адамды жұмыспен қамтып отыр. — Декреттік демалысқа шыққаннан кейін жолдасым жұмыссыз қалып, отбасымызда қаржылық қиындықтар пайда болды. Тығырықтан шығу үшін алғашқыда қарыз алып, балаларға арналған ойын алаңын аштым. Кейін кәсібімді ұлғайту мақсатында «Бизнес Бастау» курсын оқып, 200 АЕК мөлшерінде қайтарымсыз грант ұтып алдым. Бұл менің әрі қарай ізденуіме шабыт сыйлады. Бірақ 2020 жылы пандемия басталып, ойынсауық орталықтарының жұмысына тыйым салынды. Дегенмен мен мұнымен тоқтап қалмадым. Кәсіпкерлік бөліміне барып, 5 млн теңгенің грантын алудың жолын сұрадым. Осылайша, қазіргі кәсібім басталып кетті. Жұмыспен қамту орталығы арқылы «Жастар тәжірибесі» бағдарламасымен өзіме екі жұмысшы алдым. Сөз соңында айтым келгені — армандарыңызға адал болыңыздар. Тәуекел етіп, ойыңызда жүрген идеяны мемлекет көмегімен іс жүзіне асыруға болады,- дейді кәсіпкер М.Апсалямова. «Терра Вита» ЖШС құрылтайшысы-директоры Насихат Исабаевның пікірінше, ауыл-аймақта үйде отырған әйелдерге мемлекеттік бағдарламалар көбірек насихатталуы керек. — Осыдан екі-үш жыл бұрын түсіндіру жұмыстарымен ауылдарды аралаған кезімізде, әйелдердің көп нәрседен бейхабар екенін байқадым. Ауылда қолынан іс келетін шебер әйелдердің көп екеніне көз жеткізіп, оларға ақыл-кеңес беріп қайтқан едік. Сіздерге айтарым — бірден үлкен кәсіп ашуға қол созудың қажеті жоқ. Аз-аздан бастау керек. Мәселен, мен Астана қаласынан әйелдер жамылғысын сатып әкеліп, пайда тауып, қазіргі бизнесімді бастаған едім. Кез келген адам үлкен мүмкіндікке ие. Бірақ көпшілігі бойындағы сол күш-қуатты тиімді қолдана алмай жүр,- дейді Н.Исабаева. Форум соңында әйелдер арасында кең таралған мәселелерді шешудің тәсілдері ұсынылды.
Жадыра ТӨЛЕГЕНҚЫЗЫ,
«Семей таңы»
