Ақпан айы да ортасынан асты. Семейдегі жауапты мамандар көктем мезгілінде болуы мүмкін қауіптің алдын алу шараларына қазірден бастап кірісіп кетті. Қала әкімі Нұрбол Нұрсағатов көктемгі су тасқыны қаупі жоғары Пожарная Согра мен Шығыс кентінде болып, алдын алу шараларының ұйымдастырылу барысын тексерді. Одан кейін әкімдік ғимаратында төтенше жағдайлар басқармасы өкілдерінің қатысуымен кеңес өткізді.
Зарина КӘП
«Семей таңы»
Пожарная Согра кентінде бөгет салу жұмыстары басталыпты. Оған 17 техника жұмылдырылып, топырақ тасымалданып жатыр.
— Пожарная Согра және Шығыс кенттерінде су басу қаупінің алдын алу үшін арнайы дамбы жасадық. Пожарная Согра кентінде ұзындығы 500 метрдей бөгет салынады, бұл жұмыс екі күн бұрын басталды. Оған 17 техника жұмылдырылды. Сондай-ақ Шығыс елді мекенінің жанынан да ұзындығы 700 метрге жуық бөгет салу қажет. Жалпы, қала бойынша су басу қаупі бар 15 аумақ бар. Қазіргі күні 30-дан астам техника жұмыс істеуде. Тағы бір мәселе – арықтарды тазалау. Биыл каналдарды тазалауға 60 млн теңгеге жуық қаражат бөлінді. Қала бойынша 50 шақырымнан астам арық бар болса, бүгінде 30 шақырымы тазаланды. Жаз мезгілінде осы арықтарды жөндеу үшін 140 млн теңге қаражат бөлінеді. Жоспарға сай жұмыс жүргізетін боламыз,- деді қала әкімі Нұрбол Төлегенұлы.
Қалалық төтенше жағдайлар бөлімінің мәліметінше, су басу қаупі бар 15 аумақта 631 тұрғын үй бар. Қазір 13 аумақта дренаждық арналарды тазалау, су өткізгіш құбырлардың диаметрін ұлғайту, жағалауларды бекіту жұмыстарын жүргізу арқылы қауіп біраз сейілген.
— Су тасқынына қарсы іс-шаралар Су тасқынына қарсы іс-шаралардың 2021-2023 жылдарға арналған республикалық жол картасы, Абай облысы Семей қаласының 2020-2025 жылдарға арналған әлеуметтік-экономикалық дамуының кешенді жоспары, сондай-ақ 2023 жылғы су тасқыны қаупі бар кезеңге дайындық жөніндегі іс-шаралар жоспарына сәйкес жүргізілуде. Апатты жағдайдың алдын алу үшін арнайы күштер тобы жасақталып, арнайы техникалар дайындалды. Төтенше жағдайлар департаментінің жедел-құтқару жасақтарынан мобильді жедел әрекет ету топтары дайындалды, олар апатты жағдай орын алған жағдайда дереу жөнелтіледі. Қажет болса, олардың құрамына мемлекеттік органдардың өкілдері тартылады,- деді қалалық төтенше жағдайлар бөлімінің басшысы Е.Тұрсынханов.
Төтенше жағдайлар бөлімі басшысының айтуынша, табиғи және техногендік сипаттағы төтенше жағдай туралы халықты уақтылы хабардар ету тұрғындар қауіпсіздігін қамтамасыз етудегі негізгі шаралардың бірі болып табылады. Семей қаласында сигнал беретін жабдығы бар электр сиреналарының жүйесі бар. Алайда қолданыстағы электр сиреналарымен қала халқының 15 пайызын ғана хабардар ете алады. Ал қалалық телеарналар арқылы берілетін ақпарат барлық елді мекендерге жете бермейді. Семей қаласының тұрғындарын хабардар ету жүйесі 1980 жылдары орнатылған екен. Мұндағы P-164 жабдығы ескірген, цифрлық және талшықты-оптикалық байланыстарға қосылуға техникалық мүмкіндік жоқ. Алдағы уақытта осы мәселенің шешімі қарастырылмақ.
— Әрине, техника мен арнайы мамандардың жетіспеуі проблема тудырып тұр. Қаладағы қарды шығаруға жалпы саны 80 техника жұмылдырылғанымен, су басу қаупі жоғары аумақтарға тағы 30 техника жіберілді. Қазірдің өзінде 380 мың текше метр қар шығарылды. Алдағы уақытта жұмысшылардың жетіспеушілігі мәселесі бойынша тиісті шаралар қабылданады. Барлығы әкімдіктің бақылауында,- деді шаһар басшысы Нұрбол Төлегенұлы.
Жиынды қорытындылаған қала басшысы жауапты сала мамандарына су тасқыны қаупі бар аумақтардағы арықтар мен каналдарды, дренаждық жүйелерді, өзен арналарын мұздан және қоқыстан тазарту жұмысын уақтылы аяқтауды, апатты жағдай орын алған жағдайда жедел түрде әрекет етуді, әлі де түйткілді мәселелер болса, дер кезінде хабарлауды тапсырды. Сондай-ақ күні-түні кезекшілік ұйымдастырып, барлық мәселені бақылауда ұстау қажеттігін де ескертті.
