Қасиетті Рамазан айында садақа беріп, қайырымдылық жасау — ең сауапты да қайырлы істердің бірі. Қазақстан мұсылмандары діни басқармасының «Зекет және қайырымдылық» қорының Абай облысы өкілдігінің Рамазан айында ұйымдастырып жатқан қайырымдылық шаралары аясында Аягөз орталық мешіті 100 отбасыға кезекті «Рамазан қоржынын» таратты.
— Бұл жолғы игілікті шараға мешітіміздің жанашыры болған Мүсәпірбековтер әулеті, Дәмелі қажы Дүйсенбайқызы апамыздың ұрпақтары атсалысты. Марқұм апамыздың бастап кеткен ізгі де үлгілі жолын үзбей жалғастырып келе жатқан ұрпақтарына Алланың нұры жаусын!
Әбу Һурайрадан (оған Алланың разылығы болсын) риуаят етілген хадисте Алланың елшісі (оған Алланың салауаты мен сәлемі болсын): «Адам өлгенде оның үш нәрсесінен – тоқтаусыз садақасы (мысалы, құдық, көпір, медресе) немесе пайда келтіретін білімі (таратқан білімі) немесе артынан дұға қылатын игі жақсы баласынан басқа барлық амалы тоқтайды, – деді Аягөз ауданының бас имамы Алмас Айткәрімұлы.
Рамазан – қайырымдылық айы, бұл айда игі амалдың, қайырымдылық көмектің сауабы сансыз сауапқа еселенетіні белгілі. Пайғамбарымыздың (с.а.у.) хадисінде: «Рамазанның берекесі мейірімділік көрсету мен ізгі амалдар жасаумен арта түспек. Жетім мен жесірге, жоқ-жітікке қарайласу мұсылманның мерейін үстем қылады. Жетім мен жесірдің ас-суы мен киім-кешегі үшін көмек қолын созған кісі Алла жолында жиһад жасағанмен, әр түнін намаз оқып, күндізін ораза ұстаумен өткізген адам сияқты», – деп айтылған. Алла Тағала баршамызды сауапты амалдардан қалыс қалмай, жақсылықта жарысатын, иманды да ибалы, салиқалы ұрпақтардан болуды нәсіп етсін!
