«Қайырымдылық ісіңнен көрінеді» дейді қазақ. Қайырымдылық жасап, мұқтаж жандарға қолдау көрсету – халқымыздың қанында ежелден бар қасиет. Елімізде мемлекет тарапынан да, демеушілердің көмегімен де мұқтаж жандарға, көп балалы, аз қамтылған отбасыларға әрдайым қолдау көрсетіліп келеді. Айталық, 7 қаңтар күні облыс орталығында «Dauletten» қайырымдылық қоры 5 баласы бар жалғыз басты анаға баспана сыйлады.
Бес баласы бар Кенжегүлдің шаңырағында – қоныс тойы. Кенжегүл Сағатбекованың отбасына халықтың көмегімен облыс орталығынан 25 млн теңгеге 100 шаршы метрлік 4 бөлмелі баспана сатылып алынды. Көп балалы ана осыған дейін не жылуы, не суы жоқ жалдамалы екі бөлмелі пәтерде тұрған, қыстың қақаған аязында суды даладан тасыған.
«Dauletten» — бүгінде баспанаға мұқтаж жандар мен білімге құштар жастарға қолдау көрсетіп жүрген қайырымдылық қоры. Бұған дейін қор еліміздің әр өңіріндегі 55 отбасыға баспана сыйлап, 100 білімді жасқа шәкіртақы тағайындаған. «Dauletten» қайырымдылық қоры блогер, қоғам белсендісі, экономист Дәулет Төлеутайұлының бастамасымен құрылып, 2020 жылы ресми түрде Әділет министрлігінде тіркелді. Қор жұмысының басты мақсаты – түрлі санаттағы әлеуметтік көмекке мұқтаж жандар мен білімді жастарға қолдау көрсету.
Қайырымдылық қоры директорының орынбасары Бекзат Қайратұлы үй табыстауда қандай критерийлерге сүйенетіндерін айтып өтті.
— Семейге келудегі себебіміз – Кенжегүл ханымға үй табыстау. Бізге күн сайын көптеген өтініштер түседі. Оларды таңдауда бірқатар критерийлерге жүгінеміз. Бірінші кезекте, отбасы көп балалы болуы керек, одан кейін жолдасының болу-болмауы да есепке алынады. Таңдауда жалпы жағдайы ең төмен отбасыға басымдық береміз. Осыдан бір ай бұрын «Dauletten» қорының менеджерлеріне балалардың сынып жетекшісінен бұл отбасыға көмек қажет екені туралы хат келді. Біз уақыт созбай бұл отбасының жағдайын тексеріп, шынымен баспанаға мұқтаж екендеріне көз жеткіздік. Кенжегүл ханым – жалғыз басты, көп балалы ана. Біздің еріктілер үй жағдайымен танысып, видеотүсірілім жасағаннан кейін, осыдан екі апта бұрын, қаражат жинай бастадық. Бір күнде 24 млн-нан артық қаражат жиналып, осы үйді таңдап, отбасыға табыстауды ұйғардық. Барлық игі істер қайырымды жандардың тікелей қолдауымен жүзеге асып жатқанын айрықша атап өтуіміз керек, — дейді Бекзат Қайратұлы.
Оның айтуынша, әлеуметтік жағдайы төмен отбасыларға қаражат жинау «Dauletten» қайырымдылық қорының және Дәулет Төлеутайұлының Instagram әлеуметтік желісіндегі парақшаларында ұйымдастырылады. Халықтың көмегі, қайырымдылығы бір отбасының жақсы өмір бастауына себеп болуда. Бұл ретте игі іске мұрындық болған қаламыздағы №29 орта мектептің мұғалімі Шынар Көрпебаева туралы да айтпай кетуге болмас.
— Сынып жетекшісі болып тағайындалғаннан кейін әр баланың өмірі үшін жауапкершілік жүктелетінін сезінеміз. Қарлығаш, бес баланың ішіндегі үлкені, менің сыныбыма №12 мектептен қыркүйек айында ауысып келді. Отбасы мүшелерінің қарым-қатынасы, тұрмыстық жағдайы жайлы толығырақ біліп, тұрғын үй жағдайын тексеру актісін толтыру үшін оқушымның үйіне бардым. Сол кезде отбасының жағдайы ортадан төмен екенін, көмек қажет ететінін байқап, ұзақ ойландым. Қалайда көмек ұйымдастыру керек, осыны ойластыра келе Дәулет Төлеутайұлына тікелей шығуды жөн деп шештім. Хатымды жолдағаннан кейін, көп ұзамай жауап келді. Отбасының тұрмыс жағдайын тексере келе қайырымдылық қоры қол ұшын беретіндерін айтты. Жаңа жылдың алдында жеткен бұл жаңалыққа балаша қуанып, өзім үй алатындай әсерде болдым. Қайырымдылық қорының ұжымына осындай игі іс жасап жатқандары үшін ата-ана ретінде де, мұғалім ретінде де, Қазақстанның азаматшасы ретінде де алғыс айтамын! — дейді Шынар Көрпебаева.
Қуанышқа ортақтасуға келген жандарға дастарқан жайылып, ізгі тілектер айтылды.
Дана ТАЛҒАТБЕК,
«Семей таңы»
