Абай облысының әкімі Берік Уәли Семей қаласының әкімшілік-іскерлік орталығында бой көтеріп жатқан нысанның құрылыс барысымен танысты.
Екі қабатты ғимараттың жалпы ауданы – 2580 шаршы метр. Орталық 96 адамға арналған. Мұнда негізгі холл, медицина және күзет кабинеттері, спортшылардың киім ауыстыру бөлмелері, жаттықтырушылар мен төрешілерге арналған кабинеттер, әкімшілік бөлмелер және көрермендерге арналған трибуналар қарастырылған.
Қазіргі уақытта инженерлік желілерді тарту және жер жұмыстары аяқталған. Алдағы уақытта металл құрылымдарын орнату басталады. Мердігер ұйымның мәліметінше, құрылыс жұмыстары бекітілген кестеге сәйкес жүргізіліп жатыр.
Берік Уәли нысанның сапалы әрі уақытылы аяқталуы маңызды екенін атап өтті. Оның айтуынша, облыста үстел теннисіне қызығушылық жоғары. Бұл спорт түрімен айналысатындардың арасында халықаралық жарыстарда жүлде алып жүрген спортшылар да бар.
Аймақ басшысы заманауи орталық спортшылардың шеберлігін шыңдап, жоғары нәтижелерге қол жеткізуіне мүмкіндік беретінін айтты. Сондай-ақ өңірге осындай спорт кешенін салып жатқан Павлодар облысының әкімі Асайын Байхановқа алғысын білдірді.
Айта кетейік, «Абайға құрмет» акциясы аясында Семейде бірнеше нысанның құрылысы жүргізіліп жатыр. Олардың барлығы бірыңғай дизайндік кодпен, бір көшенің бойында орналасады.
