31 мамыр – Саяси қуғын-сүргін және ашаршылық құрбандарын еске алу күніне орай, қала тұрғындары «Алаш» қозғалысының көшбасшысы, көрнекті қоғам қайраткері Әлихан Бөкейханның ескерткіші алдына жиналып, мемориалға гүл шоқтарын қойды. Іс-шараға Абай облысы әкімінің орынбасары Ш.Байбеков, Семей қаласының әкімі Н.Нұрсағатов пен қоғам белсенділері қатысты.
Әйгерім СӘРСЕНҚАЛИ,
«Semeı tańy»
— Барша адамзат үшін дамудың, азаттықтың дәуірі болған ХХ ғасырды Қазақ елі бодандықтың бұғауында қарсы алғаны ақиқат. Осы бір аласапыран заманда бүтіндей бір ұлттың сенгені тек оқыған азаматтар болатын. Ұлттың ұлы тұлғалары Әлихан Бөкейхан, Ахмет Байтұрсынов, Міржақып Дулатовтар сын сағатта қазақтың ары мен намысын өз жанынан биік қойды. Азаттықты аңсады… Алайда «қызыл террордың» кесірінен олар жүз мыңнан астам жазықсыз жазаға ілінгендердің «көшін» бастап, «халық жауларын» анықтау саясатының құрбаны болды, «қауіпті элемент» деп танылып, ату жазасына кесілді. «Алаш қонған ақ боз үй» деп, Ахмет Байтұрсынұлы жырлағандай, Алашқа пана болған қарт Семей де өз биігіне шықты. Абай облысы құрылды. Тарихи әділдік қалпына келді, бұл Мемлекет басшысы Қасым-Жомарт Тоқаевтың салиқалы саясатының арқасында мүмкін болып отырғанын ерекше атап өту орынды. Заманалар ауысып, қара жер қойнына жасырғанымен, азаттық жолында құрбан болғандар ешқашан ұмытылмайды! — деді Абай облысы әкімінің орынбасары Ш.Байбеков.
Дәл осы күні абайтану мектебінің негізін қалаушылардың бірі, шәкәрімтанушы және Шәкәрім шығармаларын алғашқы насихаттаушылардың бірі әрі жарыққа шығарушы, мұхтартанушы ғалым, репрессия құрбаны Қайым Мұхамедхановтың ескерткішіне де гүл шоқтары қойылды..
Аталған шараға Абай облысының Қоғамдық даму басқармасының басшысы А.Садырбаев, Семей қалалық ішкі саясат бөлімінің басшысы О.Соғымбай, Абай музейінің директоры Т.Шаңбай, облыстық тарихи-өлкетану музейінің директоры Қ.Сабырбаев, Шәкәрім университетінің ұжымы, белгілі ғалымдар, зерттеушілер мен тарихшылар, зиялы қауым өкілдері, қоғам белсенділері, оқытушылар мен студенттер қатысты.
— Халқымыздың басынан талай нәубет пен зұлмат өтті. Көп қуғын көрген қазақ білімділерінің бірі – алаш арыстарының соңғы тұяғы Қайым Мұхамедханов. Алаштықтардың бәрі қуғын-сүргін көрген. Ұстазымыз Қайым Мұхамедханұлы алаш алыптары ақталмай тұрған кездің өзінде бізді олардың еңбектерімен сусындатты,- деді Тұрдықұл Шаңбай.
Тағылымды шарада Шәкәрім университеті филология факультетінің деканы А.Қадыров та сөз алып, оқу ордасы қабырғасында ғалымның өмірі мен шығармашылығын дәріптеу мақсатында заманауи дәрісханалар ашылып жатқанын айтты.
