Ойын алаңы – әр адамның балалық шағының бір бөлшегі. Семей қаласында 576 аула болса, соның 90 пайызының тозығы жеткен. Ағымдағы жылы 180 тұрғын үйді қамтитын 70 ауланы күрделі жөндеуден өткізіп, әр жыл сайын аулаларды кезең-кезеңімен жөндеу жоспарланып отыр. Өткен аптаның соңында 343 кварталдағы 7-8 үйлердің және Глинки көшесіндегі 30-32 үйлердің жаңартылған аулалары пайдалануға берілді.
Әйгерім СӘРСЕНҚАЛИ,
«Semeı tańy»
Салтанатты шараға қала әкімі Нұрбол Нұрсағатов және дербес бөлім басшылары, аула тұрғындары қатысты. Қызылды-жасылды шарлармен, жалаушалармен безендірілген алаң іші балақайлар мен ата-аналарға лық толды. Іс-шара барысында аниматорлар ойын-сауық бағдарламаларын ұйымдастырып, мерекенің көрігін қыздыра түсті. Балақайлар мультфильм кейіпкерлерімен асыр салып ойнады.
Халықтың салауатты өмір салтын қалыптастырып және олардың бос уақытын тиімді ұйымдастыруды мақсат еткен заманауи алаң футбол алаңы, балалар ойын алаңы, жаттығу алаңы болып үш бөлікке бөлінген. Іші жарықтандырылып, өрнектастар төселіп, көпшілік демалатын орындықтар орнатылған. Балаларға арналған әткеншектер, сырғанақ, өрмелеуіш, төбесі жабылған үйшіктер де бар. Түрлі-түсті сырлармен әсемдеп, безендірілген алаңдағы алаңқайда балалар ойнайтын құм да төгілген.
Ұзақ жылдардан бері жөндеу көрмеген аулалардың жаңартылып, жабдықталуы тұрғындарға үлкен қуаныш сыйлады.
-1995 жылы осы үйге көшіп келдік. Содан бері ауламыз биыл ғана жөндеу көрді. Балаларымыз дән риза. Біз де кешкілікте үйден шығып, аулада отырамыз. Бұрын аулада гараждар ғана тұратын. Қазір бәрін алып тастап, керемет аула жасады. Осындай қуаныш сыйлаған облыс пен қала әкіміне алғысымызды айтамыз”,- деді Глинки 30 мекенжайының тұрғыны Бақытжан Аманбердіқызы.
Шара соңында кішкентай тұрғындар арасында спорттық турнир ұйымдастырылды. Жаңартылған аулалар — кемел келешегіміздің кепілі болған балаларға жасалған қамқорлықтың бір парасы деп білеміз.
Сонымен бірге Семей қаласына қарасты Жиенәлі ауылдық округінің Бөкенші ауылына жергілікті халықтың сұрауы бойынша қала әкімі Нұрбол Нұрсағатовтың тапсырмасымен балалар ойын алаңы қолданысқа берілді.
Балалардың салауатты өмір салтын қалыптастырып және олардың бос уақытын тиімді ұйымдастыру мақсатында заманауи алаң салынды. Іші жарықшамдармен жарықтандырылып, жасанды газон төселіп, балаларға арналған әткеншектер, сырғанақ, өрмелеуіш орнатылған.
