«Ақ жол» демократиялық партиясының төрағасы Дания Еспаева алғашқы Құрылтай сайлауы аяқталғаннан кейін қазақстандықтарға үндеу жасады.
Партия төрағасы бұл сайлауды елдің саяси өміріндегі тарихи оқиға деп бағалады. Оның айтуынша, алғашқы Құрылтай сайлауы Мемлекет басшысы Қасым-Жомарт Тоқаевтың саяси реформаларының және жалпыұлттық референдумда қабылданған жаңа Конституцияның жүзеге асуының нақты көрінісі болды.
Дания Еспаева сайлау ашықтық пен әділдік қағидаттары негізінде өтіп, азаматтарға өз таңдауын еркін жасауға мүмкіндік берілгенін атап өтті. Барлық саяси партиялар ашық бәсекеге қатысып, сайлаушыларға өз бағдарламаларын таныстырды.
«Ақ жол» партиясы сайлауға тәжірибелі командасымен және елдің болашағына бағытталған жаңашыл идеяларымен қатысқанын жеткізді. Партия үшін сайлау нәтижесі тек пайыздық көрсеткіш емес, оған дауыс берген азаматтардың сенімі мен үмітінің көрсеткіші екені айтылды.
«Ақ жол» партиясы өзіне қолдау білдірген әрбір сайлаушының сенімін ақтауға күш салатынын мәлімдеді.
Партия алдағы уақытта экономиканы нығайту, отандық өндірісті дамыту, кәсіпкерлікті қолдау, жаңа жұмыс орындарын ашу және халықтың әл-ауқатын арттыру бағытындағы жұмыстарды жалғастырмақ.
«Әрбір дауыс – ел тағдырына деген азаматтық жауапкершіліктің көрінісі. Бізге сенім білдірген барша азаматқа шын жүректен алғыс айтамыз. Бірлігіміз бекем, мақсатымыз айқын болсын! Қазақстанымыздың болашағы жарқын болсын!» – делінген үндеуде.
