Абай обылысының әкімі Н.Ұранхаевтың бастамасымен Семейдегі Бейбітшілік аралында «Ашық аспан астындағы этноауыл мұражайы» жобасы қолға алынды.
Сымбат ҚАЙРАТҚЫЗЫ,
«Semei tany»
«Аспан астындағы этноауыл мұражайы» мәдени-этнографиялық жобасының мақсаты — еліміздегі байырғы халықтардың мәдениетімен таныстыру, қаламызда тұрып жатқан өзге ұлттардың мәдениетінің ерекшеліктерін, ана тілін, әдет-ғұрыптары мен дәстүрлерін дәріптеу, тұрмыс-тіршілігінен толыққанды мағлұмат беруі.
Болашақта мұражайда этникалық қауымдастықтардың өмірі мен мәдениетін көрсететін көрмелер мен этнографиялық жәдігерлер орналасатын болады. Бейбітшілік аралының ландшафттық дизайны этноауылдың көркін ашады.
Ашық аспан астындағы дала мұражайының Семей қаласының мәдени-танымдық «інжу-маржанына», оның визиттік картасына айналуына толық мүмкіндігі бар. Мұражайда экскурсиялар, шеберлік сабақтары, интерактивті бағдарламалар, фольклорлық фестивальдар, тарих сабақтары өтетін болады.
Жоба бойынша қазақтың киіз үйі, орыс, татар, неміс, ұйғыр, кәріс және белорустардың ұлттық нақыштағы көне ғимараттарының үлгісінде үй-жайлар орналастыру жоспарланған.
«Этонауыл мұражайы» — сондай-ақ әр түрлі этностардың салт-дәстүрін сақтап, болашақ ұрпаққа жеткізетін, ұлттық мәдениет пен ұлттық құндылықтарды насихаттайтын жоба.
— Этноауыл тұжырымдамасы ұлттық әдет-ғұрыптар мен халық қолөнерін жаңғырту, өзге ұлттардың барлық ерекшеліктерін бір жерге біріктіру мақсатында жасалды. «Аспан астындағы этноауыл мұражайы» жобасы Семей қаласының мәдени дамуына да ықпал етеді,- дейді жоба авторы, қалалық мәслихаттың депутаты, архитектор Асхат Бәкіров.
Осы жылы шаһар басшысы Н.Нұрсағатовтың қолдауымен қаланы көркейту бағдарламасы аясында негізгі құрылыс жұмыстары жүргізілді.
Болашақта этноауыл қаламыздағы түрлі ұлттар өкілдерінің басын біріктіруге, ұлтаралық достықты нығайтуға бағытталған мәдени-көпшілік іс-шаралар ұйымдастырылатын, тұрғындар бос уақытын өткізіп, серуендейтін тамаша демалыс орны болары сөзсіз.
