Үржар ауданында 2026 жылдың он айында негізгі капиталға салынған инвестиция көлемі 48,4 млрд теңгеге жетіп, өнеркәсіп өндірісі өткен жылдың сәйкес кезеңімен салыстырғанда 3,5 есеге артты. Ауданда жаңа кәсіпорындар іске қосылып, тұрғын үй құрылысы, жол жөндеу және әлеуметтік инфрақұрылымды жаңғырту жұмыстары жалғасуда. Бұл туралы Өңірлік коммуникациялар қызметі алаңында өткен баспасөз мәслихатында Үржар ауданының әкімі Ақылбек Башимбаев хабарлады.
Ақылбек Башимбаевтың айтуынша, биыл ауыл шаруашылығы өнімінің жалпы көлемі 61,3 млрд теңгені құрайды деп күтілуде. Егіс алқабы 114,6 мың гектарға жетіп, егін жинау жұмыстары 98,3 пайызға орындалған. Алдын ала мәлімет бойынша 204,2 мың тонна өнім жиналған.
— Биыл қосымша 1 290 гектар жерге су үнемдеу технологиялары енгізіліп, мұндай технологиялар қолданылатын алқаптың жалпы көлемі 4 429 гектарға жеткізілді. Сонымен қатар жыл басынан бері 188 ауыл шаруашылығы техникасы сатып алынды. Пайдаланылмай жатқан жерлерді мемлекет меншігіне қайтару бағытында да жұмыстар жүргізіліп, бүгінгі күнге дейін 5 388,2 гектар жер қайтарылды, — деді Ақылбек Башимбаев.
Брифинг барысында аудан әкімі жаңа өндіріс орындарының ашылуы мен инвестициялық жобалардың жүзеге асырылу барысына да тоқталды. Биыл «Сұңқар» ЖШС-нің жалпы құны 8,1 млрд теңге болатын, тәулігіне 230 тонна күнбағыс майын өндіруге қауқарлы зауыты және құны 650 млн теңге болатын, тәулігіне 60 тонна ұн шығаратын кәсіпорны іске қосылған. Нәтижесінде 65 жаңа жұмыс орны ашылған.
— Бүгінде ауданда 4 035 шағын және орта кәсіпкерлік субъектісі жұмыс істейді. Жыл басынан бері 22 жаңа кәсіпкерлік нысан ашылып, 130-ға жуық тұрғын жұмыспен қамтылды. «Ауыл аманаты» бағдарламасы аясында 97,6 млн теңгеге 13 жоба қаржыландырылды, — деді аудан әкімі.
Тұрғындарды баспанамен қамтамасыз ету бағытында да бірқатар жобалар жүзеге асырылуда. Биылғы он айда ауданда 8 154 шаршы метр тұрғын үй пайдалануға берілген. Қазіргі уақытта Үржар, Науалы, Ақжар және Егінсу ауылдарында жалпы 90 пәтерге арналған 45 екі пәтерлі тұрғын үйдің құрылысы жүргізілуде. Оның 74 пәтері толық дайын. Қалған пәтерлердің құрылысын қараша айында аяқтау жоспарланған.
Сонымен қатар Үржар ауылында жеке инвестордың қаражаты есебінен құны 850 млн теңге болатын 40 пәтерлі бес қабатты тұрғын үйдің құрылысы басталған. Нысанды 2027 жылдың соңына дейін пайдалануға беру көзделіп отыр.
Әлеуметтік инфрақұрылымды дамыту аясында білім беру және денсаулық сақтау нысандарын жаңғыртуға да ерекше көңіл бөлінуде.
— «Ауылдық денсаулық сақтауды жаңғырту» ұлттық жобасы аясында Үржар ауылында құны 3,1 млрд теңге болатын 12 төсек-орындық тері арқылы коронарлық араласу орталығының құрылысы аяқталды. Орталық заманауи медициналық құрал-жабдықтармен қамтамасыз етілді. Бұл тұрғындарға жоғары технологиялық медициналық көмекті ауданнан шықпай-ақ алуға мүмкіндік береді, — деп атап өтті Ақылбек Башимбаев.
Білім беру саласында Бауыржан Момышұлы атындағы орта мектептің күрделі жөндеу жұмыстары аяқталған. Сонымен қатар 12 мектеп ғимараты мен олардың жылу жүйелеріне ағымдағы жөндеу жүргізілген. Ал Жоғарғы Егінсу ауылында 100 орындық жаңа клуб пайдалануға берілген.
Ауданда жол және инженерлік инфрақұрылымды жаңғырту жұмыстары да жалғасуда. Биыл аудандық маңызы бар автомобиль жолдары мен ауыл көшелерін жөндеуге 1,4 млрд теңге бөлінген.
— Бөлінген қаражат есебінен 7,7 шақырым елді мекенаралық және 14,2 шақырым ауылішілік автомобиль жолы жөнделді. Сонымен қатар «Үржар – Барқытбел – Қарабұйрат» автомобиль жолының 15 шақырым учаскесінде орташа жөндеу жұмыстары жүргізілуде. Бұл бағыттағы жұмыстар алдағы жылы да жалғасады, — деді спикер.
