Ағымдағы жылы даңқты батырларымыз Сағадат Нұрмағамбетов пен Рахымжан Қошқарбаевтың 100 жылдығын жергілікті атқарушы органдармен және білім басқармасымен бірлесіп кеңінен атап өту қажет. Бұл туралы Абай облысы Қорғаныс істер жөніндегі департаментінің бастығы, полковник Нығмет Ахметұлы ардагерлер ұйымдарының төрағаларымен өткен кеңесте айтты.
2023 жыл қорытындыланып, 2024 жылы атқарылатын іс-шаралар талқыланған жиында Нығмет Ахметұлы ардагерлер ұйымдарының есебін тыңдап, жоспарға сәйкес атқарылатын тапсырмаларды жеткізді. Ол көктемгі және күзгі мерзімді әскери қызметке шақыру науқанына белсене қатысу, «Айбын» Халықаралық әскери-патриоттық жастар жиынына сапалы дайындықты ұйымдастыру мен «Аналар жүрегі» сарбаздар аналары Республикалық ұйымымен бірлесіп тығыз қарым-қатынаста жұмыс жасау керектігін атап өтті.
Айта кетейік, өткен жылы облыста ардагерлердің қатысуымен 250-ден астам әскери-патриоттық іс-шаралар ұйымдастырылған. Жыл сайынғы дәстүрлі түрде өтетін «Айбын» республикалық әскери-патриотық жастар жиынына, әскери-патриоттық клубтардың, «Жас Ұлан» мектеп тәрбиеленушілерінің және әскери қызметшілерінің балалары қатысуда. Өткен жылғы жиын халықаралық форматта өткізіліп, облыстың намысын қорғаған «Абай қырандары» әскери-патриоттық клубы жоғары нәтиже көрсетті. Сонымен қатар, жыл сайын 1 қыркүйекте өңіріміздің барлық мектептерінде білім күніне арналған «Ерлік сабақтары» өткізілуде.
Жалпы, Абай облысында 300-ден астам әскери-патриоттық клубтар 7 мыңнан астам баланы қамтыса, 70-тен астам «Жас сарбаз» сыныбында 1350 бала тәрбие алуда, ал үш «Smart Sarbaz» үйірмесінде 63 бала білім алады екен. Абай облысы Қорғаныс істер жөніндегі департаменті жергілікті атқарушы органдармен, жалпы білім беретін мекемелерімен, қоғамдық ұйымдармен және ардагерлермен жоғары дәрежедегі бірлескен жұмыстар атқаруда.
Абай өңірлік гарнизонының баспасөз қызметі
