«AMANAT» партиясы Абай облыстық филиалының партиялық бақылау комиссиясының отырысы өтті. Жиынға облыстық филиалдың атқарушы хатшысы Нұржан Әбдікәрімов, Абай облысы әкімінің орынбасары Димитрий Гариков, облыстық ТЖД бастығы Манарбек Шапағатов пен партиялық бақылау комиссиясының мүшелері және БАҚ өкілдері қатысты.
Айтолқын САМАТОВА,
«Semeı tańy»
Жиынның күн тәртібіне су тасқынына дайындық, сондай-ақ барлық гидротехникалық құрылыстардың жай-күйін тексеру және әзірлігін қамтамасыз ету мәселелері қаралды.
Облыс әкімінің орынбасары Димитрий Гариков су басу қаупі бар аймақтарда 38 елді мекен орналасқанын айтты. Оларда 2775 тұрғын үй, 10 мыңға жуық халық бар. Оның ішінде 5 елді мекенді су басу қаупі жойылса, 25 елді мекенде барынша азайтылған.
— Ауа райы нашарласа, 8 елді мекенде су басу қаупі сақталады. Олар Бесқарағай ауданының Грачи, Стеклянка, Белокаменка, Черемушки, Бірлік, Қарабас ауылдары, Бородулиха ауданының Речное ауылы және Ақсуат ауданындағы Ұлан елді мекені. Бұл елді мекендердің барлығы Ертіс пен Уба өзендерінің бойында орналасқан. «Казгидромет» РМК филиалының деректеріне сүйенсек, үш ауданда топырақтың 100 сантиметрден терең қатуы байқалады: Бородулиха ауданында — 106 см, Абай ауданында — 120 см, Бесқарағай ауданында — 133 см. Облыстың өзге өңірлерінде бұл көрсеткіш 34-63 см аралығында. Топырақ жамылғысының терең қатуына байланысты, еріген қар су жерге сіңе алмай, су жоғары қабатқа шығады,- деді Д.Гариков.
Облыс әкімі орынбасарының айтуынша, биыл облыста су тасқынының қаупі жоғары. Себебі өткен жылмен салыстырғанда топырақтың қату көрсеткіші терең. Сонымен қатар 20 жылда алғаш рет биыл Ертіс өзенінде мұз өте жай қатқан. «Казгидромет» РМК филиалының болжауынша, Шығыс Қазақстан және Абай облыстарында 2023 жылдың қараша және 2024 жылдың наурыз айлары аралығы суық және жауын-шашын аз болды, ал екінші жарты жылдық жылы және жауын-шашынды болады деп болжануда
— Біз ықтимал су тасқынына қызу дайындық жүргізіп жатырмыз, өйткені осы жылы алаңдауға негіз боларлық бірнеше көрсеткіштер бар. Күз жауын-шашынды болып, кейін бірден аяз түсті. Салдарынан топырақтың қату көрсеткіші жоғары. Су тасқыны кезеңінде төтенше жағдайлар қызметкерлері мен облыс тұрғындары үшін жағдайды қиындататын факторлардың бірі – мұздың кеш қатуы. Биыл 20 жылда алғаш рет Ертіс өзенінде мұздың қатуы өте жай болды. Облыстағы аудандар алдағы қиын кезеңге дайын емес. Әлсіз тұстарды анықтау мақсатында оқыту мен тексеру жұмыстарын жүргізіп жатырмыз. 2018 жылы суды ескертусіз ағызып жіберген Шүлбі су электр станциясына қатысты жағдай енді қайталанбайды деп ойлаймын. Су электр станциясы күнделікті су жіберу кестесін береді, бұл менің жеке бақылауымда. Көктемде жарылыс жұмыстарын жүргізген кезде судың бөлінуін арттыру жоспары 3200 текше метрге жетеді. Биыл Семей қаласы, Бесқарағай және Бородулиха аудандарында жарылыс жұмыстары жоспарлануда, – деді Димитрий Гариков.
Абай облысы төтенше жағдайлар департаментінің басшысы Манарбек Шапағатовтың айтуынша, «Қазгидромет» РМК Абай облысында су тасқынының қаупі жоғары деп бағалаған.
Жиынға қатысушылар мен партияның бақылау комиссиясының мүшелері облыста табиғи апаттың алдын алу бағытында атқарылып жатқан жұмыстар жөнінде өзара пікір алмасты.
Отырысқа онлайн режімде қосылған Ақсуат аудандық партия филиалының төрағасы Е.Құттыбаев өңірдегі көктемгі су тасқынына дайындық шаралары жайлы баяндады.
Партиялық бақылау комиссиясының аталған мәселеге байланысты кезекті отырысы наурыз айында өтеді.
