Жуырда Семейде мектеп директорларына арналған «Табысты менеджер» атты І облыстық байқау өтті. Байқауға басқару өтілі 5 жылдан кем емес мемлекеттік орта білім беру ұйымдарының бірінші басшылары қатысты.
Мектеп директорларына арасында алғаш рет ұйымдастырылған облыстық байқаудың мақсаты — орта білім беру ұйым басшыларының көшбасшылық әлеуетін анықтау және қолдау, облыстағы озық инновациялық менеджментті насихаттау.
Байқау барысында 11 директор бақ сынап, тұлғалық және кәсіби даму жоспарларын ұсынып, білім беру менеджментіндегі инновациялық жобаларын қорғады.
Қатысушылар бірінші кезеңде басқару жүйесіндегі жобаларын TEDx форматында қорғады. «Табыс формуласы» кейсін шешуде өз тәжірибелерін бөлісіп, тиімді басқару шешімдерін, педагогикалық ұжыммен сындарлы өзара әрекеттесуде кәсіби құзыреттіліктерін көрсетті.
Конкурс нәтижесі бойынша І орынды Үржар ауданы Жансүгіров атындағы орта мектеп директоры Алия Ахметова жеңіп алды. ІІ орынды Семей қаласы №15 ЖОББМ директоры Кайрбек Абылкасимов, Аягөз ауданы Қалалық көпбейінді қазақ мектеп-гимназиясының директоры Айнур Канапьянова, ІІІ орынды Жарма ауданы Ақтайлақ би атындағы орта мектеп директоры Ерзат Канапьянов, Бородулиха ауданы Жезкент кентінің мектеп-лицей директоры Гульнара Апенова иеленді. Жүлдегерлер І, ІІ, ІІІ дәрежелі дипломдармен марапатталды. Сондай-ақ Абай облысының кәсіподақ ұйымының қолдауымен І орын иегеріне шипажайға, ІІ орын иегеріне Алакөл демалыс орнына жолдама, ал ІІІ орын иегеріне ақшалай сыйақы табысталды.
Өзге қатысушылар «Жаңашыл басшы», «Білікті басшы», «Табысты басшы», «Шығармашыл басшы», «Үздік көшбасшы» аталымдарымен марапатталды.
Еске салсақ, биыл Мемлекет басшысының тапсырмасы бойынша «1000 өзгерістер көшбасшысы» жобасы іске қосылды. Республикалық кадрлық резервке Абай облысынан 15 мұғалім өтті.
