Абай облысында балалар мен жасөспірімдердің қауіпсіздігін қамтамасыз ету – маңызды мәселелердің бірі. Өңірде бұл бағытта кешенді профилактикалық шаралар тұрақты түрде жүргізілуде.
Биыл жасөспірімдер арасындағы қылмыстық оқиғалар 25%-ға артқан. Семей қаласында бұл көрсеткіш екі есеге көбейген. Бұл туралы өңірлік коммуникациялар қызметі алаңында өткен баспасөз мәслихатында Абай облысы Полиция департаменті Жергілікті полиция қызметі басқармасы бастығының орынбасары, полиция подполковнигі Бауыржан Садақбаев мәлімдеді.
— 2024 жылдан бастап Әкімшілік құқық бұзушылық туралы кодекске арнайы өзгеріс енгізіліп, буллинг пен кибербуллинг үшін заңды өкілдерге ескерту жасау немесе айыппұл салу қарастырылған. Биыл қала мектептерінің бірінде оқушыны ұзақ уақыт бойы қорлау фактісі тіркеліп, тиісті шаралар қабылданды, – деді спикер.
Жаз мезгілі мен мектеп демалысы кезеңінде балалардың көпқабатты үйлердің терезесінен құлау фактілері жиілеп отыр. Осыған байланысты Абай облысының Төтенше жағдайлар департаменті жыл сайын алдын алу жұмыстарын жүргізуде. Былтыр бұл бағыттағы ақпараттық түсіндіру жұмыстары 1 500-ден астам адамды қамтыған.
— 2022–2024 жылдар аралығында өңірде балалардың терезеден құлауына қатысты 29 оқиға тіркелді. Тек былтырдың өзінде мұндай 13 жағдай орын алды. Өкінішке қарай, үш бала көз жұмды. Қайғылы оқиғалар көбіне ата-аналар тарапынан тиісті бақылаудың болмауынан, сондай-ақ жиһаздың терезе маңында орналасуынан және балалардың москит торларына сүйенуінен туындайды, – деп атап өтті Абай облысы Төтенше жағдайлар департаментінің Төтенше жағдайлардың алдын алу басқармасының бастығы, азаматтық қорғау майоры Нұрсұлтан Алдонғаров.
Осы орайда кәмелетке толмағандар арасындағы құқықбұзушылықтың алдын алу мақсатында облыс аумағында 10 сәуір мен 6 мамыр аралығында «Жасөспірім» жедел-профилактикалық іс-шарасы бастау алған болатын.
Бауыржан Садақбаевтың айтуынша, аталған шара аясында 330 қызметкер жұмылдырылып, тек алғашқы төрт күн ішінде 180 кәмелетке толмаған бала ішкі істер органдарына жеткізілген. Нәтижесінде 181 әкімшілік құқықбұзушылық анықталды. Сонымен қатар, 14 жасөспірім бейімдеу орталығына орналастырылып, 5 ата-ана арнайы есепке қойылған. Оқу орындарында құқықтық сауаттылықты арттыру мақсатында 56 дәріс, ал киберқауіпсіздік мәселелері бойынша 14 кездесу ұйымдастырылған.
Аталған шаралар жасөспірімдер арасындағы құқықбұзушылықтың алдын алуға, оларды қоғамға бейімдеуге және қауіпсіз болашағын қалыптастыруға бағытталған.
