2025 жылғы 16 сәуірде Абай облысы, Семей қаласындағы Шәкәрім университетінің «Үш анық» конференц-залында «Мәдениетаралық диалогты дамытудағы және нығайтудағы жастардың бастамалары» атты ғылыми-тәжірибелік конференция өтті. Онлайн және оффлайн форматта ұйымдастырылған шараға түрлі деңгейдегі жастар өкілдері, ғалымдар, диаспора жетекшілері мен белсенділер қатысты.
Шараның басты мақсаты – жастардың толеранттылық, мәдени әртүрлілікке құрмет және өзара түсіністік құндылықтарын ілгерілетудегі маңызды рөлін талқылау болды. Конференция барысында жастардың мәдениетаралық өзара әрекеттестікті нығайтуға бағытталған нақты бастамалары мен ұсыныстары кеңінен ортаға салынды.
Президент ұстанымымен үндес бастама
Мемлекет басшысы Қасым-Жомарт Тоқаев өз Жолдауларында және түрлі жиындарда:
«Біздің жастар – еліміздің ертеңі. Олар тек білімді ғана емес, ашық көзқарасты, төзімді және өзара құрметке негізделген қоғамды қалыптастырушы күшке айналуы тиіс» – деп атап көрсеткен болатын.
Семейде өткен бұл конференцияда көтерілген мәселелер де осы стратегиялық ұстаныммен тығыз үндесіп, еліміздегі бейбітшілік пен келісім құндылықтарын бекемдеуге бағытталды.
Баяндамашылар мен тақырыптар:
• Шабан Серкан Дінічтүрік – Түркиядағы Қазақ диаспорасының жетекшісі. Халықаралық мәдени байланыстар тәжірибесімен бөлісті.
• Әлібекқызы Амангүл – №47 мектептің оқушысы. Жастар көшбасшылығы мен диалогқа қосар үлесін нақты баяндады.
• Ысқақ Бауыржан Мұратбекұлы – «Тұран-Астана» университетінің профессоры. Жастар бастамаларын қолдаудың стратегиялық тәсілдерін ұсынды.
• Қабыкенов Диас – М. Әуезов атындағы колледж студенті. Волонтерліктің мәдениетаралық байланыс орнатудағы әлеуетіне тоқталды.
• Молдакашев Қуаныш Панарбекұлы – Абай облысы этномедиация кеңесінің төрағасы. Этномедиацияны бейбітшілік формуласы ретінде таныстырды.
• Тлемисов Улан Бағдатұлы – Шәкәрім университетінің аға оқытушысы. Этносаралық қатынастарды жастар көзімен талдап, заманауи ұсыныстарын жеткізді.
Конференцияның модераторы – Жастарды әлеуметтік қолдау және дамыту орталығының басшысы, PhD докторы, қауымдастырылған профессор Оразғалиева Арайлым Канатқызы.
Негізгі ойлар мен қорытындылар
Шара барысында жастардың мәдениетаралық коммуникациядағы белсенділігі, білім беру саласының диалог орнатудағы рөлі, азаматтық белсенділік пен әлеуметтік жаңашылдықтарды дамыту мәселелері жан-жақты қаралды. Қатысушылар осындай бастамаларды болашақта кең көлемде жалғастыруға дайын екендіктерін білдірді.
Қорытынды бөлімде ұйымдастырылған ашық сұрақ-жауап алаңы жастар мен сарапшылар арасында еркін пікір алмасуға жол ашты. Бұл – ұрпақтар арасындағы түсіністікті нығайтып, қоғамның мәдени бірлігіне өз үлесін қосары сөзсіз.
Мәдениетаралық диалог – бірлік пен тұрақтылықтың сенімді кепілі. Ал осы диалогты ілгерілетуде жастардың белсенді рөлі бар екенін Семейде өткен конференция тағы бір мәрте айғақтады.
Улан Тлемисов,
Бизнес жоғары мектебінің аға оқытушысы
Shakarim University
