Semeytany.kz – Курчатов қаласындағы «Компания Балапан Көлігі» ЖШС-нің өндірістік базасы өңірлік теміржол тасымалының маңызды нүктесіне айналған. Облыс әкімі Берік Уәли серіктестіктің локомотивтерге техникалық қызмет көрсететін орталығында болып, кәсіпорын жұмысымен танысты.
Қазіргі таңда компанияда 1000-нан аса адам еңбек етеді. Негізгі қызмет бағыты – көмір мен темір кенін теміржол арқылы тасымалдау. Қазір кәсіпорын Ақтөбе облысындағы «Бенкала» кен орнынан Шолақсай станциясына дейін көмір жеткізумен айналысса, сонымен қатар Абай, Шығыс Қазақстан, Алматы облыстары мен өзге аймақтарға да қатты отын тасымалдайды.
Үздіксіз жүк тасымалын қамтамасыз ету үшін компания өз меншігіндегі және тартылған локомотивтерге техникалық қызмет көрсетіп, жөндеу жұмыстарын жүргізуде. Сондай-ақ өз теміржол желісін жаңғыртып, жаңаларын салумен айналысады. Бұл бағытта басқа ұйымдарға тиесілі теміржол инфрақұрылымына да техникалық қолдау көрсетіледі.
Аймақ басшысы кәсіпорын жұмысын жоғары бағалап, оның өңірлік маңызына тоқталды.
– Теміржол – стратегиялық сала. Бұл кәсіпорын көмір жеткізумен қатар, өңір тұрғындарын тұрақты жұмыспен қамтып отыр. Мұндай өндірістерге қолдау көрсету – әкімдік үшін маңызды, – деді Берік Уәли.
