Semeytany.kz – Абайдың 180 жылдық мерейтойына орай Абай ауданында «Этно ауыл Жидебай» атты ірі туристік кешеннің құрылысы басталды. «Абай-Шәкәрім» кесенесі аумағында бой көтеретін жобаның іргетасын қалау рәсіміне облыс әкімі Берік Уәли мен меценат Бектас Медғатов қатысты.
Абай ауданының тумасы Бектас Медғатовтың жеке қаржысына салынатын кешен 60 гектар аумақты қамтиды. Жобаның жалпы құны – 1,2 миллиард теңге. Нысанның басты мақсаты – өңірдегі туризмді дамыту, мәдени-рухани мұраны насихаттау және Жидебайды халықаралық туристік бағытқа айналдыру.
Кешен құрамында жыл бойы жұмыс істейтін киіз үйлер мен бунгало қонақүйлер, этно-SPA орталығы, қоғамдық тамақтану орындары, ипподром, хайуанаттар бағы, конференц-зал, тимбилдинг аймақтары, электромобильдерге арналған қуаттау станциялары және қымыз құю желісі болады. Жоба жүзеге асқанда 50 адам тұрақты жұмыспен қамтылады.
Облыс әкімі Берік Уәли бұл бастама тек туризмді ғана емес, өңір экономикасын да ілгерілететін жоба екенін айтты.
– Құлжановтар әулеті «Туған жерге туыңды тік» акциясына үн қосып, Жидебайдың жанынан демалыс орнын ашпақ. Бұл – көптің көптен бергі арманы еді. Сондай-ақ меценат Бектас Шыңғысұлы Қарауылда заманауи қонақ үй салуға кірісті. Аумағы 1200 шаршы метрден асатын кешенде мейрамхана, кофейня, жазғы терраса, балалар алаңы мен бильярд залы болады. Бұл нысан іске қосылған соң тағы 15 адамға тұрақты жұмыс орны ашылады, – деді аймақ басшысы.
Жобаға жергілікті әкімдік толық қолдау көрсетіп отыр.
