Semeytany.kz – Абай облысының 13 мұғалімі мен 2 оқушысы Алматыдағы «Медеу» мұз айдынында өткен «Аламан құрақ – 2025» жобасы аясында әлемдік рекорд орнатуға қатысып, Global Book of Records тізіміне енді.
Ұлттық қолөнерге арналған бұл шарада еліміздің түкпір-түкпірінен жиналған 660 құрақшы жалпы ауданы 1366 шаршы метр болатын алып құрақ көрпені бірлесе құрап шықты. Бұл – құрақ көрпеге арналған тұңғыш халықаралық рекорд.
Абай облысының атынан Семей, Аягөз, Көкпекті және Абай аудандарындағы мектептердің мұғалімдері мен оқушылары қатысты. Олардың арасында қаладағы гимназиялар мен лицейлер, ауыл мектептері және қосымша білім беру мекемелерінің өкілдері болды.
Өңірлік үйлестіруші ретінде Семей қаласындағы №19 мектептің ұстазы Бақытжан Шапенова жетекшілік етіп, Абай облысының қатысушыларын ұйымшылдықпен бастап барды.
Жобаның авторы – Аягөз ауданы, Таңсық ауылының тумасы, қолөнер жанашыры Нұргүл Абайхан. Оның бастамасымен жүзеге асқан бұл жоба ұлттық құндылықтарды ұлықтап қана қоймай, қазақ аналарының ауызбіршілігі мен өнерін халықаралық деңгейде танытты.
