Semeytany.kz – Шілде айында Абай облысында республикалық деңгейде алғаш рет ASK CAMP жастар форумы ұйымдастырылды. Іс-шараны ҚР Мәдениет және ақпарат министрлігі мен Абай облысының Жастар саясаты мәселелері жөніндегі басқармасының қолдауымен «Қазақстан студенттер альянсы» республикалық жастар қозғалысы өткізді.
Форумға еліміздің түкпір-түкпірінен 300-ге жуық белсенді студент, ерікті және жас көшбасшы қатысты. «Елім-ай» демалыс орнында лагерь форматында өткен үш күндік форумда білім беру сессиялары, мотивациялық кездесулер, командалық ойындар мен ASK Cup футбол турнирі ұйымдастырылды. Сондай-ақ, қатысушылар Жидебайда экологиялық акция өткізіп, қоғамға пайдалы бастамаларға үлес қосты.
Форум аясында түрлі сала өкілдерімен ашық диалогтар өтті. Олардың қатарында ҚР Мәдениет және ақпарат министрлігінің Жастар және отбасы істері комитетінің басқарма басшысы Тастемір Ақұлан, Абай облысының Жастар саясаты басқармасының басшысы м.а. Олжас Бейсенбаев, Alikhan Bokeikhan University проректоры Айрат Базенович, Астана қаласы Қоғамдық кеңесінің жанындағы жастар ісі жөніндегі комиссия төрағасы Бақдәулет Болатұлы және «Азаматтық Альянс» ЗТБ президенті Эльзира Ауесхановна бар.
ASK CAMP форумы «Jas Power» жобасы аясында өткізілді. Бұл жоба жас көшбасшылардың әлеуетін арттыру, азаматтық белсенділікті дамыту және патриоттық тәрбие беруді мақсат тұтады. Қатысушылар форум соңында өңірлерінде әлеуметтік жобаларды іске асыру үшін қажетті білім мен дағдыларға ие болды.
