Semeytany.kz – Бүгін облыс әкімі Берік Уәлидің төрағалығымен кеңейтілген аппараттық кеңес өтті. Жиын барысында еңбек қауіпсіздігі, интернет алаяқтықпен күрес, сондай-ақ 2025 жылғы көктемгі мерзімді әскери қызметке шақыру науқанының барысы сөз болды.
Полиция департаменті бастығының орынбасары Елдос Закимовтың айтуынша, биылғы 6 айда облыста 814 алаяқтық фактісі тіркелсе, соның 485-і интернет арқылы жасалған. Бұл өткен жылмен салыстырғанда 7 пайызға көп. Құқық қорғау органдары 1100-ден астам фишингтік сайтты бұғаттап, 15 адамды жауапқа тартқан. Сонымен қатар, 425 дроппер анықталып, заңсыз рәсімделген 276 несиенің күші жойылып, алаяқтардан 98,6 млн теңге қайтарылған. Облыс әкімі Берік Уәли халықты алдап жүрген күмәнді компаниялардың тізімін БАҚ-та жариялап, түсіндіру жұмыстарын күшейтуді тапсырды.
Жиында еңбек қауіпсіздігі мәселесі де қозғалды. Облыстағы Мемлекеттік еңбек инспекциясы департаментінің басшысы Ерлан Ниятқабыловтың айтуынша, жыл басынан бері өндірісте 22 адам зардап шеккен. 431 заңбұзушылық анықталып, 64 жоспардан тыс тексеру жүргізілген. Аймақ басшысы жұмыс орындарындағы қауіпсіздікке жауапкершілікпен қарау қажет екенін ескертіп, барлық құрылыс нысандарында еңбек жағдайына мониторинг жүргізуді тапсырды.
Сондай-ақ, Абай облысында 2025 жылғы көктемгі әскери шақыру науқаны 93,2 пайызға орындалғаны айтылды. Қала және аудан әкімдеріне бұл бағыттағы жұмысты жандандыру тапсырылды. Облыс әкімі барлық тапсырмалардың орындалуын жеке бақылауына алатынын жеткізді.
