Semeytany.kz – Қазақстан мен Қытай арасындағы шекарада жүргізушісіз жүк тасымалын енгізуге бағытталған «Ақылды кеден» пилоттық жобасы іске қосылды. Бастама алғаш рет республика бойынша Абай облысында жүзеге асырылып отыр.
Жоба аясында «Бақты» (ҚР) – «Покиту» (ҚХР) өткізу пункттері арқылы автоматтандырылған жүк тасымалы іске қосылады. Бұл туралы Қаржы министрлігі Мемлекеттік кірістер комитетінің төрағасы Жандос Дүйсембиев пен Тачэн қаласы партия комитетінің хатшысы Чжи Сяньвэйдің жұмыс кездесуінде келісілді. Кездесуге Абай облысы бойынша Мемлекеттік кірістер департаментінің басшысы Руслан Данияров та қатысты.
Бастаманың мақсаты – шекарадан жүк өткізу процесін түбегейлі өзгерту. Жоба аясында жүргізушісіз көліктер (AGV), бірыңғай электронды декларация, толық цифрлық сүйемелдеу, автоматты навигация және тәулік бойы жүк қозғалысын қамтамасыз ету сияқты технологиялар енгізілмек.
Нәтижесінде жүк тасымалы көлемі жылына 10 миллион тоннаға дейін артады деп күтілуде. Сонымен қатар, кедендік рәсімдеудің уақыты қысқарып, көлік шығындары азаяды. Жоба логистикалық ашықтық пен қауіпсіздікті арттырып, инфрақұрылымға түсетін жүктемені азайтады.
Бұл бастама Абай облысы үшін маңызды инфрақұрылымдық серпін беріп қана қоймай, ауыл шаруашылығы өнімдерінің экспортын жандандырып, жаңа жұмыс орындарын ашуға және Қытаймен экономикалық байланысты нығайтуға жол ашады. Жоба аясында екі елдің ведомстволары өзара ынтымақтастық туралы меморандумға қол қойды.
