Semeytany.kz – «Шығыс» өңірлік қолбасшылығына қарасты 35411 әскери бөлімінде әскери міндеттілердің жиыны басталды. Бұл шара – тек әскери даярлықтың ғана емес, ел қауіпсіздігі үшін жауапкершілікті арттыруға бағытталған маңызды бастама.
Жиынға Шығыс Қазақстан облысынан 75 азамат қатысуда. Ал салтанатты ашылу рәсімінде тоғыз әскери міндетті Отан алдындағы адалдық антын қабылдады. Қатысушылар бұл кезеңде тактика мен стратегия негіздерін меңгеріп, алғашқы медициналық көмек көрсету дағдыларын жетілдіреді.
Жиын барысында әскери қызметке бейімделу, әскери әрекеттерге даярлық және еліміздің қорғаныс қабілетін күшейту көзделген. Жаттығулар офицерлер мен сержанттардың жетекшілігімен жүргізіліп, тәжірибелерімен бөлісу арқылы жастарды тәрбиелеуге ықпал етпек.
Осындай оқу-жиындар патриоттық рухты арттырып, азаматтардың Отан алдындағы борышына деген көзқарасын нығайтуда маңызды рөл атқарады.
