Semeytany.kz — Абай облысының әкімі Берік Уәли қаланы аралау кезінде «Семей Құрылыс Материалдары» ЖШС-не барып, кәсіпорынның жұмысымен танысты. Зауыт 1961 жылдан бері жұмыс істейді, бүгінде мұнда 300-ге жуық адам еңбек етеді.
Кәсіпорын шифер, асбокартон, газобетон және фиброцемент панельдері сынды құрылыс материалдарын шығарады. Соңғы рет зауыт 2024 жылы жаңғыртудан өткен. Жыл сайын мыңдаған тонна шикізат өңделіп, өнім өндіру көлемі біртіндеп артып келеді.
Зауыттың өндірістік қуаты – жылына 2,9 миллион шаршы метр шифер, 60 мың текше метр газобетон және 1,44 миллион шаршы метр цементті панельдер. Алдағы бес жылда кәсіпорын жаңа зауыт салуды және интерьерлік панельдер шығару жобасын жүзеге асыруды көздеп отыр.
Аймақ басшысы құрылыс индустриясының экономикалық маңызына тоқталып, жергілікті әкімдік тарапынан қолдау болатынын айтты. Сонымен қатар, болашақта облыста салынатын ірі құрылыс нысандарына осы зауыттың өнімдері пайдаланылуы тиіс екенін ескертті.
