Semeytany.kz – Абай облысының әкімі Берік Уәли BINOM мектептер желісінің басқарушы директоры Шолпан Қадыровамен кездесіп, Семей қаласында жаңа мектеп салу мәселесін талқылады.
Кездесу барысында Шолпан Қадырова өңірде BINOM мектебін мемлекеттік-жекеменшік әріптестік аясында салу туралы ұсыныс білдірді. Аймақ басшысы бұл бастаманы қолдайтынын айтып, дарынды балаларға арналған заманауи мектептің қажет екенін жеткізді.
«Облысымызда дарынды балаларға арналған арнайы мектеп жоқ. Бірақ соған қарамастан оқушыларымыз халықаралық және республикалық деңгейде жоғары нәтижелерге жетіп жүр. BINOM мектебі ашылса, бұл балалардың әлеуетін арттыруға сеп болады», – деді облыс әкімі.
Қазіргі таңда BINOM желісіне еліміздің түрлі өңіріндегі 8 мектеп кіреді. Онда 32 мыңға жуық оқушы білім алып, 1800-ден астам мұғалім жұмыс істейді. Бұл мектептерде жаратылыстану-математикалық бағыт пен STEM, жобалық оқыту сынды заманауи тәсілдер кеңінен қолданылады.
