Semeytany.kz – Абай облысында энтеровирустық инфекциялар мен жіті ішек аурулары бойынша эпидемиологиялық ахуал тұрақты бақылауда. Бұл туралы Өңірлік коммуникациялар қызметінде өткен брифинг барысында белгілі болды.
Облыстық санитариялық-эпидемиологиялық бақылау департаменті басшысының орынбасары Айгүл Тоқтабаеваның айтуынша, 2025 жылдың басынан бері 245 ішек инфекциясы тіркелген. Оның 76 пайыздан астамы – 14 жасқа дейінгі балалар. Бұл көрсеткіш былтырғы жылдың сәйкес кезеңімен салыстырғанда 1,3 есеге артқан.
– Аурудың негізгі себептері – үй жағдайында дайындалған тағамды дұрыс сақтамау және термиялық өңдеудің жеткіліксіздігі, – деді Айгүл Тоқтабаева.
Облыста сальмонеллездің 20 жағдайы анықталған. Олардың 90 пайызы Семей қаласына тиесілі және басым бөлігі балалар арасында кездескен.
Биыл энтеровирустық инфекциялардың ең ауыр түрі саналатын серозды менингиттің 8 жағдайы тіркелген. Бұл былтырғы жылмен салыстырғанда жалпы алғанда 6 жағдайға, ал балалар арасында 9 жағдайға азайған. Аурудың негізгі таралу жолы – ашық су қоймаларында шомылу және қайнатылмаған суды пайдалану. Осыған байланысты облыс аумағындағы 67 су қоймасы мен 5 субұрқақтан сынама алынып, бәрі теріс нәтиже көрсеткен.
Абай облысының бас инфекционисті Имдат Эфендиев атағандай, қатты бас ауруы, дене қызуының көтерілуі және құсу – энтеровирустық менингиттің басты белгілері. Мұндайда уақыт жоғалтпай, дереу дәрігерге қаралу қажет.
– ЭВ менингитке күдік туған жағдайда жұлыннан сұйықтық алу (пункция) әдісі қолданылады. Бұл науқастың жағдайын жеңілдетумен қатар, нақты диагноз қоюға мүмкіндік береді. Облыстық жұқпалы аурулар ауруханасы толық жабдықталған, қызметкерлер қажетті даярлықтан өтті, – деді дәрігер.
Эпидемиологиялық ахуалдың ушығуына жол бермеу үшін апта сайын мониторинг жүргізіліп, зертханалық зерттеулер мен түсіндіру жұмыстары тұрақты атқарылуда. Мамандар жаз мезгілінде жеке бас гигиенасын сақтап, белгісіз сауда орындарынан тағам сатып алмауға, тағам өнімдерінің жарамдылық мерзіміне назар аударуға шақырды.
Алда өтетін Абай Құнанбайұлының 180 жылдық мерейтойына орай ұйымдастырылатын ауқымды шаралар қарсаңында санитарлық талаптарды күшейту қажеттігі де ескертілді.
