Semeytany.kz – Абай облысында міндетті әлеуметтік медициналық сақтандыру жүйесіне қатысушылардың үлесі 83,8 пайызға жетті. Бұл туралы Өңірлік коммуникациялар қызметінде өткен брифингте облыстық Денсаулық сақтау басқармасының басшысы Талғат Молдабеков мәлімдеді.
Оның айтуынша, келесі жылы республика көлемінде қосымша 1 миллион азамат сақтандыру жүйесімен қамтылады. Абай облысы бойынша бұл тізімге 27 мың тұрғын кіреді. Оның ішінде 20 мыңы – тұрақты табысы жоқ, өмірлік қиын жағдайға тап болған D санатындағы азаматтар болса, қалған 7 мыңы – әлеуметтік осал топқа жататын E санатындағы тұрғындар.
2026 жылдан бастап еліміз Бірыңғай медициналық көмек пакетіне көшпек. Жаңа жүйе денсаулық сақтау саласының әділеттілік пен тең қолжетімділік қағидаттарына негізделеді.
Бұдан бөлек, «Әлеуметтік медициналық сақтандыру қоры» Абай облыстық филиалының директоры Ельмира Рахимбаеваның айтуынша, 2026 жылдан бастап жұмыс берушілер мен жұмыскерлер үшін жарна есептеу лимиті арттырылады. Жұмыс берушілер үшін бұл шек 40 ең төменгі жалақыны, ал жұмыскерлер үшін 20 ең төменгі жалақыны құрайды. Осы өзгерістер арқылы жыл сайын жүйеге шамамен 200 миллиард теңге қосымша қаржы түседі деп күтілуде.
Ал 2027 жылдан бастап мемлекет тарапынан төленетін жарна мөлшері 2,2%-ға дейін, ал 2037 жылға қарай 4,7%-ға дейін кезең-кезеңмен өседі.
Айта кетерлік жайт, 2024 жылдан бастап МӘМС жүйесіне кемінде бес жыл қатарынан жарна төлеген азаматтар табысынан уақытша айырылған күннің өзінде алты айға дейін «сақтандырылған» мәртебесін сақтап қала алады.
