Semeytany.kz – Қазақстан Премьер-министрінің орынбасары Ермек Көшербаев Абай облысына жасаған жұмыс сапары аясында Ұлы ақынның 180 жылдық мерейтойына дайындық барысымен танысты.
Негізгі мерекелік іс-шаралар өтетін орын – Қарауылтөбе алаңы. Облыс әкімі Берік Уәли осы аумақта атқарылып жатқан жұмыстар туралы баяндап, дала сахнасы, ат жарысы алаңы, киіз үйлер қалашығы, сауда аймағы мен инфрақұрылым жүйелері толық қамтылып жатқанын жеткізді. Мұнда 400 орындық сахна мен 184 киіз үй орнатылады. Электр, жарық, су тартылып, санитарлық талаптарға сай жабдықтар қойылды.
Сондай-ақ, «Абай-Шәкәрім» мемориалдық кешеніндегі қалпына келтіру жұмыстары аяқталуға жақын. «Қазреставрация» мекемесі кесенелерді жөндеп, жарық жүйесін ретке келтіріп жатыр. Ал Абай саябағында көгалдандыру мен абаттандыру жұмыстары жүріп жатыр. Осы саябақта «Жеті қазына» фестивалі өтеді.
Үкімет басшысының орынбасары дайындық жұмыстарына оң баға беріп, қалған істерді сапалы әрі уақтылы аяқтауды тапсырды.
