Semeytany.kz – Абай облысында республикалық маңызы бар жолдардың жалпы ұзындығы 2 176 шақырымды құрайды. Соның ішінде 1 592 шақырым «ҚазАвтоЖол» ҰК» АҚ Абай облыстық филиалының қарамағында. Бұл туралы Өңірлік коммуникациялар қызметінде өткен брифингте филиал директоры Айбек Ануарбеков мәлімдеді.
Оның айтуынша, қазіргі уақытта өңірде 250 шақырым жолда орташа жөндеу жұмыстары жүріп жатыр. Бұл учаскелерге «Семей – Қайнар», «Семей – Барнаул», «Қарағанды – Аягөз – Тарбағатай – Бұғаз» бағыттары кіреді. Сонымен қатар 584 шақырым жолда қайта жаңарту жұмыстары қолға алынған. Атап айтқанда, «Қалбатау – Майқапшағай» және «Талдықорған – Қалбатау – Өскемен» жолдары жаңғыртылуда.
Келесі жылдары Қазақстан Даму Банкі қаржыландыратын қосымша 522 шақырым жол жөндеуден өтпек.
Бұдан бөлек, жол қозғалысы қауіпсіздігін арттыру үшін өңірде 14 автоматтандырылған өлшеу құралы орнатылып, бірнеше ауыл мен Семей қаласында ангарлар мен көлік аялдайтын шатырлар салынуда. Қызыл-Кесік ауылында ангар құрылысы жүріп жатыр. Ақпараттық таблолар да жаңартылып отыр.
