Semeytany.kz – Облыс әкімі Берік Уәли Семей қаласын аралау барысында өңірдегі ірі өндіріс ошақтарының бірі – «Силикат» ЖШС кәсіпорнында болып, оның жұмысымен танысты.
Кәсіпорын жыл сайын 74 миллион дана силикат кірпіш, 90 мың тонна құрылыс әгі мен 250 мың тонна құрылыс құмын өндіреді. Бұған қоса, силикат-бетон тақталар, алты қырлы бетон плиталар мен құрғақ сылақ қоспалары да шығарылады. Мұнда 422 адам тұрақты жұмыс істейді. Өнім көлемі жылына 100 миллион данаға дейін жетеді.
Берік Уәли зауыттың өндірістік желілері мен жаңа технологияларын көріп, жұмысшылармен әңгімелесті. Басшылық кәсіпорынды кеңейтіп, экспорттық әлеуетті арттыру және жаңа жұмыс орындарын ашу жоспарын таныстырды.
Зауыт директоры Жұмабек Ибраевтың айтуынша, кәсіпорын өнімдері сапасы жағынан жоғары, қазіргі таңда еліміздің бірнеше қаласында тұрғын үйлер осы силикат кірпіштерімен салынып жатыр.
«Құрылыс қарқын алған сайын жергілікті өнімге сұраныс артады. Өзіміздің кәсіпорындарды қолдау – жаңа жұмыс орындарын ашуға жол ашады», – деді облыс әкімі.
