Semeytany.kz – Облыс әкімі Берік Уәли Семей қаласындағы өндіріс орындарын аралау барысында кабель өнімдерін шығаратын «Казэлектромаш» ЖШС-нің жұмысымен танысты.
1995 жылдан бері жұмыс істеп келе жатқан кәсіпорын жылына 15 мың шақырымға дейін кабель өнімін шығарады. Қазір мұнда 200-ден астам адам еңбек етуде. Зауыт орта және жоғары кернеулі кабельдермен қатар, байланыс, монтаждық және бақылау сымдарын, сонымен қатар әуе желілері мен су асты жабдықтарына арналған сымдарды өндіреді.
Зауыт басшысы Виталий Распопин аймақ басшысына жаңа жобалар мен өндіріс үдерістері туралы баяндап, өнімге жергілікті сұраныстың аз екенін атап өтті. Осыған байланысты кәсіпорын мемлекеттік қолдау бағдарламаларына сүйене отырып, жергілікті нарықты кеңейтуді жоспарлап отыр.
Берік Уәли Кәсіпкерлік басқармасына зауытқа қолдау көрсету жөнінде тапсырма берді. «Кәсіпорынның әлеуеті жоғары, өнімдері сапалы әрі бәсекеге қабілетті. Мердігер ұйымдар осы зауыттың өнімдерін пайдалануы тиіс», – деді облыс әкімі.
