Semeytany.kz – Афинада өтіп жатқан грек-рим күресінен 17 жасқа дейінгі жасөспірімдер арасындағы әлем чемпионатында семейлік спортшы Нұрдәулет Құмарұлы күміс медаль жеңіп алды.
Олимпиада резервінің аймақтық спорт колледжінің 2-курс студенті 48 келі салмақ дәрежесінде ел намысын қорғап, 18 елден қатысқан балуандардың арасынан суырылып шығып, финалға дейін жетті. Осы нәтижесі үшін оған «Спорт шебері» атағы берілді.
Нұрдәулет бұған дейін де Азия чемпионаттарында топ жарып үлгерген. 2024 жылы Иорданияда қола, ал биыл Вьетнамда өткен бәсекеде алтын жүлде иеленген болатын. Ел чемпионаттарында да бірнеше мәрте жеңіс тұғырынан көрінген.
Балуанды жарысқа дайындаған – Жақсылық Үшкемпіров атындағы №1 облыстық олимпиадалық резерв мамандандырылған балалар-жасөспірімдер спорт мектебінің жоғары санатты жаттықтырушысы Мұрат Амиров.
