Semeytany.kz – Абайдың 180 жылдығына арналған мерекелік онкүндік аясында Семейде Түркістан облысының мәдени күндері басталды. Қос өңір арасындағы рухани-мәдени байланыс негізінде ұйымдастырылған шаралар аясында ауыл шаруашылығы өнімдерінің жәрмеңкесі де өтуде.
Түркістаннан жеткізілген 540 тоннадан астам өнімнің ішінде 194 тонна картоп, 81 тонна көкөніс, 71 тонна жеміс-жидек, 167 тонна сүт өнімдері бар. Сонымен қатар, жергілікті бал, шырын, шұжық, жұмыртқа сынды қайта өңделген азық-түліктер ұсынылуда. Әсіресе Мырзашөлдің қауыны мен Шардараның қарбызына сұраныс жоғары болды.
Жәрмеңкемен қатар қолөнер көрмесі өтіп, ағаш, киіз, қыш бұйымдары мен кілем, зергерлік әшекейлер көрермен назарына ұсынылды. Түркістаннан келген өнер ұжымдары — «Тұмар» этно-фольклорлық ансамблі, «Фараб» би тобы, «Сарын» және филармония әншілері тұрғындарға көтеріңкі көңіл-күй сыйлады.
Абай облысының әкімі Берік Уәли жәрмеңке мен көрмені аралап, өңір тұрғындарының атынан Түркістан облысына алғысын білдірді. Аймақ басшысы Түркістан мен Семейдің рухани байланысына ерекше тоқталып, осындай игі шаралардың жиі өткізілуі қажеттігін айтты.
Ұйымдастырушылардың айтуынша, тұрғындар тарапынан сұраныс жоғары. Таңертеңгі сағат 7-ден бастап кезекке тұрғандар көп болған. Түркістан облыстық ауыл шаруашылығы басқармасы басшысының орынбасары Ермұхамбет Құралбеков жергілікті халықтың ерекше ықыласын атап өтті.
Айта кетейік, мәдени күндер ертең де жалғасады.
